VIERS IL FRIÛL. Sapade, di gnûf dut impaltanât in Parlament

Si reste in podê dal calendari de Comission Belanç dal Senât par savê se Sapade-Plodn e tornarà al Friûl. Des ultimis gnovis che o vin di Rome, il lavoron fat tai mês passâts par sblocâ la situazion si è arenât denant dal parê che al à di rivâ di chest orghin, dopo che la Comission bicamerâl pai Afârs Costituzionâi e à za votât a favôr dal passaç di regjon pal comun dal Cjadovri, midiant une leç ordenarie, e duncje in maniere plui rapide rispiet a ce che e previodarès une leç costituzionâl. Il motîf di chest ritart al ven justificât dal fat che la Comission e à un grum di facendis di puartâ indenant prime di podê esprimisi su cheste benedete leç. Stes discors ae Cjamare dai Deputâts dulà che, dopo l’ordin dal dì di Zenâr dal onorevul Zanin par sburtâ sul passaç di Cint, no si à savût plui nuie. A chest pont, va ben la pazience ma che nol sedi di tacâ a pensâ mâl, pûr pecjant, come che al diseve Andreotti? Cun dut chel moviment che si sint ator su lis Regjons, sul Friûl e il so statût speciâl in particolâr, nol è che a stedin tornant a slargjâ il savalon par meti di gnûf il cjâf sot? No son di fat dome i comuns al confin tra Venit e Friûl a spietâ che il Parlament e il Guvier si nicin:  almancul altris vincj si cjatin ta stesse posizion in dute Italie. L’ultin in ordin di timp, il comun di Comelic, che ai 30 di Març passâts al à votât il referendum par passâ al Sud Tirôl (cence però rivâ al quorum). In fin dai conts, fint cumò i unics che a son rivâts efetivementri a cambiâ regjon a son siet comuns de Alte Valmarecchia, passâts des Marcjis ae Emilie. ❚
Il Cjargnel