VIERS IL FRIÛL. Ancjemò intarts e tecnicisims cuintri de volontât popolâr

Aromai si sin usâts al tiremole di Rome pe cuistion di Sapade/Plodn. A Zenâr, la Comission Belanç dal Senât e varès vût di tornâ a cjapâ in man la propueste di leç pal passaç di Regjon, su la fonde dal referendum dal 2008 che, midiant di chel, la int dal paîs e à decidût di tornâ in Friûl. L’ostacul principâl, che si è daûr a cirî di superâ cun cualchi emendament, al reste la cuviertidure finanziarie par puartâ da pît la operazion, stimade in cinccent mil euros. Ma disputis procedurâls, calendaris di votazions che si incrosin, prioritâts par altris leç, a continuin a fâ rimandâ dut. Tant che il sindic di Sapade Manuel Piller Hoffer al à tacât a alçâ la vôs, stuf di restâ tal limbo di no podê savê cemût impostâ lis politichis economichis e aministrativis dal paîs.
par confuartâ i sapadins che la bataie e sta lant indenant, a son rivâts sù il president dal Consei Franco Iacop e la europarlamentâr Isabella De Monte, une dai dôi senatôrs che a vevin a so timp depositade la propueste di leç. “I intarts e i tecnicisims no àn di scoragjâ  – a àn dit i doi politics – il percors al è ancjemò lunc ma dopo il vôt de Comission Afârs Costituzionâi il test de leç al dovarès rivâ insom, diretementri ae Cjamare dai Deputâts, evitant cussì il passaç al Senât”. Tal stes timp, il Governadôr dal Venit Zaia intune interviste, ricognossint il risultât dal referendum dal 2008 e la volontât dai citadins, al è tornât però a ingolosî l’ambient fevelant des prospetivis che si vierzaressin cul progjet di colegament feroviari tra Calalzo, Cortine e Lienz, in viste de Candidature pai Mondiâi di schi dal 2021.
E je stade une acelerade tai ultins dîs di Zenâr cul parê favorevul de Comission Belanç al emendament di cuviertidure dai 700 mil euros di mancjât vuadagn dal Stât. Cumò dut al passe ae Comission Afârs Costituzionâi, e pe fin di Fevrâr si podarès vê il vôt definitîf dal Parlament. ❚
✒ David Zanirato