Videocontrol dal trafic in Carinzie

La federazion des citâts e à domandât plui di une volte la pussibilitât di podê controlâ in mût automatic i diviêts di passaç intes zonis pedonâls e intes pistis ciclabilis dai centris des citâts. Daûr dal model talian e di altris citâts europeanis, ancje in Austrie al podarès deventâ pussibil di controlâ cun videocjamaris i passaçs che a doprin i automobii par jentrâ intal centri, cussì che a podedin jentrâ nome chei che a stan dulinvie, chei che a van intai parcaments soteranis, i taxis e i furnidôrs. Al congrès des citâts, che al è stât fat intal Jugn dal 2022 a Vilac, no mancul di 25 citâts a àn mostrât il lôr interès su chest cantin, e fra chestis a son Vilac e Wolfsberg. Daûr di chest, il ministri dai traspuarts al à inmaneât un mudament dal codiç stradâl a scomençâ dal 2026, autorizant il videocontrol intes zonis sieradis al trafic. Intant che Viene e volarès meti subit in vore il progjet, al somee che in Carinzie l’interès al sedi calât o che al sedi cjalât cun suspiet. Stant al ufici stampe citadin, la plui part dal centri di Vilac, ven a stâi la place principâl, e sarès pedonâl bielzà di trente agns e za intai agns passâts a varessin cjapadis misuris par dispersuadê e ridusi il trafic dai automobii, ma in dì di vuê no esistin progjets concrets pe instalazion di videocjamaris. Dut câs, la citât e sarès contente di chest proviodiment, ancje se e tignarès in cont di vandi altris pussibilitâts. A Wolfsberg, intant di chê, a àn decidût di no instalâ telecjamaris e un altri refudament al rive ancje de capitâl Clanfurt, che ancje inte suaze de federazion des citâts e à simpri fat cuintri a cheste misure. Clanfurt no vûl deventâ une citât pedonâl, ma juste une citât a trafic limitât. Cu la spartizion dal trafic, che e fâs jentrâ i automobii ogni 10 minûts, al è za stât fat tant par ridusi al minim il trafic individuâl. Ancje a Sant Armacul no si vûl scancelâ dal dut i autos dal centri citadin. Li no esist inmò nissune limitazion al trafic e si pense che la videovigjilance no coventi.
◆ Ancjemò une volte la Austrie si distache dal rest de Europe, ancje se in chest câs al è dificil stabilî se e fasedi di feralut di code o se, al contrari, si mostredi cetant plui rispietose de riservatece, improibint al “grant fradi” di controlâ ogni moviment dai citadins… o salacor i citadins austriacs a son une vore plui rispietôs des regulis, de circolazion improibide o des limitazions al trafic in confront di altri paîs europeans. ❚