Intant de campagne eletorâl la presidente de Regjon Friûl-Vignesie Julie, Debora Serracchiani, e veve mostrât diviersis vierziduris sui temis jevâts dal associazionisim militant furlan e si veve impegnade a miorâ la situazion malsestade che la aministrazion di centri diestre e veve lassât pe lenghe furlane. Passât un an de sô elezion però nol è che lis robis a ledin cui sa ce miôr.
Cualchi pas indenant si lu à fat – il regolament pe certificazion linguistiche o la adesion ae rêt europeane pe promozion de diversitât linguistiche (NPLD) – ma la liste des robis che no van e je avonde plui lungje: la programazion des politichis pal furlan e je ferme par vie che no si à inmò fat bon al Plan Gjenerâl di Politiche Linguistiche; a son stâts gjavâts i fonts pe cartelonistiche e pe comunicazion istituzionâl e lis sieltis fatis pai sportei linguistics a riscjin di premiâ realtâts che no àn produsût grancj risultâts; lis politichis pai media a pidimentin propit chei mieçs di comunicazion che ta chescj agns a àn lavorât di plui e miôr; te scuele l’insegnament curicolâr de/in lenghe furlane se ancje al è partît cumò al è daûr a lâ sù pai stecs.
Che lis robis no ledin par nuie ben al è sot dai voi di ducj, ancje se cualchidun al à miôr voltâsi di chê altre bande. Cussì al sucêt che se lis plui impuartantis realtâts impegnadis pe lenghe furlane si dan adun par denunciâ la situazion e par domandâ une “rivoluzion culturâl” de bande de aministrazion regjonâl, a “marcâ visite” a son propit i rapresentants politics regjonâi, di maiorance e di oposizion. Un front trasversâl che al mostre ce puest che la lenghe furlane e à par lôr. A pensâi ben, nuie di gnûf viodût che la ultime leç finanziarie de aministrazion Tondo e la prime di chê Serracchiani si cjatin in cunvigne tal dâi ae lenghe furlane la stesse percentuâl di belanç, ven a dî il 0,02%.
Dipendial de criùre di bêçs o di une cuistion di mentalitât? La rispueste e ven facile se si pense che no si à volût fâ diviersis azions pe lenghe a “cost zero” intant che altris, a paritât di risorsis invistidis, a son stadis fatis pardabon cence criteri. La cuistion però e je inmò plui clare se si slargje la voglade su la Europe. Cun di fat a son almancul dôs realtâts che, par numar di personis che a fevelin une lenghe minorizade, si puedin confrontâ cul Friûl-VJ, o sei la Comunitât Autonome Basche e il Gales. Intal prin câs par promovi la lenghe proprie, e cence contâ istruzion e mieçs di comunicazion, si invistìs l’1% dal belanç regjonâl (passe 100 milions di euros). In Gales, simpri cence contâ scuele e radiotelevision, si met pe lenghe il 0,17% dal belanç (plui di 30 milions). Un abìs rispiet a chel 0,02% che il Friûl – VJ al met par promozion, istruzion e media.
No je dome une cuistion di dirits linguistics e nazionâi, achì si trate di invistî sul unic element che in dì di vuê al permetarès ae nestre Regjon di mantignî e di rilançâ la sô autonomie e la sô specialitât cun ducj i vantaçs che indi vegnin ancje par chei citadins dal Friûl – VJ che no fevelin par furlan, par sloven o par todesc. Si cjatìn denant dal paradòs che, ator pe Europe, cui che al à une lenghe proprie al lavore par infuartîle parcè che al sa che si à di pontâ alì par difindi l’autoguvier e achì invezit si rive fintremai a coionâ cui che al promôf la lenghe.
Po ben, se e je vere che i furlans a dan il miôr cuant che ur colin intor lis disgraciis, alore o sin propit su la strade juste par mostrâ trop che o valìn… ❚
✒ Carli Pup
