L’autist dal camion partît di Rome al è disorientât. Al mene un caric plen di oparis preziosis e al è sigûr di jessisi pierdût. Dopo al cjate il zovin contadin Marc, i parons de ostarie, none Dolores e un paisut scuindût tra lis monts, ma tal centri de atenzion internazionâl. Cent personis daûr a preparâ mostris e a messedâ cuadris e sculturis che a vegnin dai plui grancj museus europeans, e che a rivin a puartâ là sù plui di 400 mil visitadôrs. La art che e trasforme une comunitât e e torne a dâi snait a un teritori. Al è il miracul di Dieç. A contâlu, un docufilm diret dal regjist udinês Thomas Turolo cu la fotografie di Federico Annicchiarico. Une conte sociâl dulà che la realtât si mude in poesie. La proiezion inte Filmoteche vaticane, tacade di Casa Santa Marta, e pant il miracul devant dal prin spetatôr: Pape Francesc. La prime proiezion di chest cine, di fat, e je stade fate a Rome devant di lui, e la dì dopo li dal Senât de Republiche taliane, inte sale Koch di Palaç Madama. Une storie di resistence e cûr, e une comunitât unide e vitâl che ogni an e met dongje une mostre dedicade a un teme fondamentâl pe esistence umane. La scomesse e je tacade intal 2004, e e à segnât un gnûf inizi par un borc di 340 animis. E cussì, propit dulà che la strade e finìs e ducj a cirivin un futûr inaltrò, a son rivadis lis oparis di Raffaello, Tiziano, Rembrandt, Caravaggio e apassionâts di dut il mont. A lavorâ di un scûr a di chel altri al progjet, doi plevans iluminâts: pre Alessio Geretti, docent di teologjie dogmatiche e di iconografie cristiane a Udin, e bons. Angelo Zanello, fondadôr dal Comitât di Sant Florean, che al inmanee lis mostris. E cun lôr i borghesans di Dieç, pronts a dâ acet e a ufrî la bielece di cui che al sa jessi comunitât. ❚
Floriana Bulfon
