La divignince slave dal toponim e conte
lis resons de fondazion de vile
“Lis citâts a son lis testemoniis mutis dal passâ dal timp. Fin dal prin lûs des civilizazions, lis citâts a àn rapresentât il cûr de vite sociâl e politiche”. Ancje cheste volte, tacâ cuntune citazion nus permet di meti subit un pît intal vuê, ma cence dismenteâ il passât. Chês dôs frasis parsore a son gjavadis fûr de presentazion de edizion 21 dal Festival èStoria, finide di pôc. Intal test si anticipave il teme de edizion: “Citâts”. Un riferiment clâr a GO! 2025 che o sin contents di cjapâ come sugjeriment par tacâ il nestri piçul viaç inte Contee.
◆ No si à simpri a ce fâ cuntun significât toponomastic cussì limpi e ancje cussì evident ancjemò vuê. “Gurize” e rive di “gorica” (culine), che e je il diminutîf di “gora” (mont), une peraule di derivazion slovene nete. Il cuel che si fevele al è chel dulà che si viôt il cjistiel ben cognossût, ancje se si pense che l’insediament al sedi plui antîc. Chest ultin si slargjave da pît dal cuel e al veve za il non che o cognossìn: “villa quae sclavorum lingua vocatur Goriza”. Cussì si lei intal diplome dal imperadôr Oton III, dai 28 di Avrîl dal 1001, la prime menzion che o vin. Il toponim e il periodi no son casuâi: chest teritori al jere stât metût a culture e ripopolât cun int slave dopo lis tremendis invasions ongjaris dal secul precedent.
◆ Ma la centralitât dal cuel no si cjate dome tal non dal lûc. A cjapâlu tant che element fondamentâl pe nassite di un centri di podê piçul ma tegnadiç al fo il cont Werihen dal Friûl. Al vignì beneficiât, insiemi cul patriarcje Zuan IV, de donazion citade in doi diplomis di chel stes an, che e cjapave dentri il cjistiel e il teritori di Salcan (Solkan, vuê in Slovenie) cul paîs di Gurize. Di fat, o il stes Werihen o un dai siei sucessôrs al à trasferît la sô sede di Salcan a Gurize, fasint sù, simpri tal secul XI, un prin fuartin parsore dal cuel; une posizion strategjiche e facile di difindi. Di là sù si à une visuâl largje che va des Alps fin al mâr e che cjape dentri une buine part dal Friûl centrâl.
◆ Ma i Conts a vevin ancje interès par fâ cressi un centri citadin complet. La planure dongje de lôr gnove sede no jere dome mancul dislontane des stradis di comunicazion rispiet a Salcan, ma e jere ancje difindude, a soreli amont, di un grant flum, il Lusinç. La dignitât citadine si saldà plui voltis: tal 1210 a vegnin concedûts i dirits di marcjât al borc superiôr, a chei si zontin tal 1307 lis prerogativis comunâls. Chest al jere il nucli abitât disvilupât dongje dal cjistiel. Chescj dirits, tor la metât dal Cuatricent, a vegnin slargjâts ancje ai borcs inferiôrs.
◆ Gurize e deventà cussì une piçule capitâl. E dut al jere tacât de “gorica”, de culine, la testemonie vere dal passâ dal timp (par tornâ a citâ la prime frase). Un cuel che, intal so non, al è deventât citât: Gurize, cul so “complean” che si festeze propit ai 28 di Avrîl. ❚
