Se si visite Milan e il Domo, subit dopo no si pues no fâ une cjaminade te Galarie Vittorio Emanuele li dongje, la crosere di cuatri viis cuviertis cul tet fat di lastris, i biei palaçs e il paviment decorât in maniere pardabon siore. Se le fasês pe prime volte, us somearà strani viodi chel trop di personis dutis adun intun ciert pont dal centri de galarie, che a fasin moviments stranis.
Propit li, sul paviment, al è dissegnât un biel taur modelât intant che si jeve adalt in dute la sô potence e morbin: e je aromai deventade usance, puar, plantâ il tac dal pît dret propit su la nature de biade bestie e fâ trê zirevoltis. A disin che al puarti fortune. Il mosaic tal timp si è tant fruiât che cumò a àn pensât di fâ une busute svasade li dal “pont strategjic” par favorî chest sconzûr cence ruvinâ il taur.
Dut chest us al conti parcè che in pôcs a san che l’autôr di cheste “atrazion” al è un furlan: Giacomo Fabricio, nassût a Clausêt (in provincie di Pordenon) intal 1876.
Al jere rivât a Milan di zovin, cun dome la tierce elementâr tant che titul di studi, ma cun tante voie di lavorâ e di fâsi larc. Dopo cualchi an, in gracie dal jutori de femine Anita Martinoia che e jere di une famee siore di Milan, al à fondade la dite «Fabricio e Blasoni» specializade in teraçs e mosaics, li che al à dât lavôr ancje a tancj siei paisans.
Lu spieghe un biel articul di Gianni Colledani scrit tal «Strolic pal 2020» de Societât Filologjiche Furlane, li che al zonte altris notiziutis su chest grant personaç che, tornât siôr di vecjo tal sô paîs, al à fondât l’asîl infantîl e la cjase di polse che cumò e puarte il so non.
A dî la veretât, une ocasion par visâsi di lui tant plui impuartante di chê che e je a Milan in bande dal so taur, li che – dut câs – al è scrit cu lis pierutis «G. Fabricio». ❚
