Par intervistâlu mi tocje clamâlu al telefon a Corniglia, in Ligurie. Thomas Colussa, furlan di Çumpite di Reane, al fâs il cogo a Milan, ma cumò al à di stâ dute la Istât li, puar!
◆ Al fâs il “chef personâl” par un impuartant avocat di Milan, e duncje al à di fâ l’Istât te vile di famee, su la Riviere Ligure.
◆ Un mistîr che si viodilu fâ dome al cine o nomenât sui gjornâi, e Thomas cemût isal rivât a fâlu? «Mê mari e à simpri vût ristorants, e duncje fin de etât di 7-8 agns o ai frecuentât une cusine, ma o vevi molât la scuele par tacâ a lavorâ cun gno pari di marangon. Dopo o ai decidût di finî il tierç an di scuele alberghiere al Civiform e o soi lât a vore tai ristorants» Daspò des primis esperiencis in Friûl al va in Sicilie e in Grecie, par tornâ a vore chenti, li di Bastianich «une esperience fondamentâl, li che o ai imparât pardabon la organizazion di un ristorant: ordin, pulizie, metodi». Dopo chel, Thomas al torne tal forest e pe prime volte al rêç lui la cusine in un ambient in Thailandie, cun 6 personis sot di lui. Dopo al va a Ibiza, e di li a Milan par 5-6 agns.
◆ E il mistîr di cogo personâl cemût isal rivât? «Par câs, dopo une stagjon a Madonna di Campiglio une vore impegnative li che o ai comandât in contemporani dôs cusinis di doi albiercs grancj. Ae fin o soi tornât a Milan scuintiât e mi à clamât un gno amì chef par proponimi chest lavôr. O ai fat 15 dîs di prove e vêmi ca. Al è un lavôr ben paiât che ti lasse tant timp par te.»
◆ Il ledrôs de medaie al è che nol è creatîf come chel di un ristorant «ma par cumò al va ben cussì, parcè che mi stoi impegnant in un altri progjet». Thomas, di fat, al si è butât sui social a fevelâ di cusine in un mût gnûf, ven a stai «in maniere sexy: dut chel che al sta ator dal fâ da mangjâ, ma contât in maniere picante.» Cumò il progjet lu à blocât il Covid (al veve di partî in Avrîl), ma «par cumò o fâs esperience fevelant devant di une telecjamare, e tignîsi pronts: intant lait a cirî l’hashtag sexychef». Cjaris letoris, cumò no stait a dî che chest articul no us à incuriosidis… ❚
Dree Venier
