Lant ator pe Italie dispès al capite, cuant che si dîs di jessi furlans, di cjatâ int che nus dîs “Ah, mi visi dal Friûl! O ai fat il militâr a Udin!”. Prin dal taramot, un abitant su dîs chenti al jere un soldât e cheste ereditât di “tiere di primulis e casermis” se puartìn intor come une maledizion.
◆ Tai ultins 20 agns o vevin juste tacât a disvuedâ lis casermis, dopo che tal Nûfcent il Friûl al jere stât jemplât di soldâts al pont di no jessi plui une tiere vierte, une crosere di popui e di lenghis ma une megainstalazion militâr cuntune regjon intor. E cumò? O jerin juste sul pont di gjavâsi fûr de logjiche de “Sentinele de Patrie”, dal “confin invalicabil”, de dissipline marziâl, che za la Union Europeane, sburtade de invasion russe de Ucraine, e fevele di riarmâsi.
◆ Al è clâr che, stant che la aleance cui Americans e clope, il guvier nol pues plui fâ masse cont sui arsenâi militârs che a Davian a varessin vût di coventâ a “sigurâ” la dissuasion strategjiche de NATO. Si fevele za di trasferî lis fuarcis americanis in paîs come la Ongjarie, ma di cuant che Donald Trump al è al podê pe seconde volte lis cjacaris a son cussì tantis che si fâs fature a capî la veretât.
◆ In ogni câs, a tornin a soflâ aiars di vuere che o pensavin dismenteâts: e al ven di domandâsi ce puest che al ocuparà il Friûl in chescj gnûfs senaris. Soredut, al ven di pensâ a cetantis risorsis umanis e economichis che a vignaran pierdudis sul altâr de ri-militarizion. Forsit vuê nol coventarà plui vê in Friûl 120 mîl soldâts come intai agns Sessante, ma za cussì o fasìn fature a tignî achì i zovins furlans: se la uniche prospetive che o vin di dâur e je chê de vuere, alore a fasin ben a lâ vie.
◆ E di fat, lu stan za fasint. Parcè che il Friûl al è za disarmât: lu àn disvuedât dai soldâts ma no lu àn jemplât in nissune altre maniere. Sì, e je nassude la Universitât ma ce ise deventade? Invezit di peâ ancjemò di plui i furlans de lôr tiere, dantjur braùre des lidrîs e cussience de unicitât de lôr divignince, ur da i imprescj par scjampâ ancjemò prin e ancjemò plui lontan dai lôr vons. I dâts a fevelin di 30 mil fantats dai 18 ai 34 agns che a son lâts vie dal 2011 al 2023. E stant che il decrement demografic nus da simpri mancul sperance, ce soluzions vino par dâ sperance ai nestris fîs e par difindisi des menacis dal avignî? No coventin bombis ni drons par chest, ma ideis, inovazions, oportunitâts: e soredut, e covente pâs.
◆ I erôrs che i oms a àn fat tal lôr passât a son tancj, e lis lezions di podê imparâ a saressin cetantis. Ma invezit di onorâ i muarts imparant a no fâ plui la vuere, “cu la scuse di onorâ lis vitimis de vuere si continue a celebrâ la vuere”. Lu diseve pre Toni Beline e ogni tant, lu amet, o pensavi che al esagjeràs: e invezit, come simpri, al veve reson. La sô vôs profetiche nus vise che tornâ a preparâsi par scombati al vûl dî rassegnâsi a un avignî cence pâs e cence progrès. Nus tocje a nô scoltâle o – come al è capitât dispès – ignorâ i profetis “in patrie” par dopo scugnî pintîsi dal tuart che ur vevin fat, e che nus torne cuintri. ❚
Un Friûl disarmât
Walter Tomada
