Un cjasâl didatic par ricuardâ la sfide di Daniele Del Negro

Cemût nassial e ce isal il vuestri progjet?”
“Il nestri progjet al previôt di realizâ un cjasâl didatic intal Comun di Paulâr, vâl a dî une realtât agricule vierte dut l’an là che i visitadôrs a podaran osservâ e imparâ il funzionament di diviersis ativitâts leadis al arlevament e ae agriculture.
◆ Cheste idee e nas de volontât di puartâ indenant il lavôr scomençât agns indaûr di un fantat, Daniele Del Negro, e e je stade pussibile in graciis de partecipazion a un bant regjonâl dedicât al recupar des ativitâts rurâls presintis intes zonis margjinâls, caraterizadis duncje di criticitâts plui grandis e di dificoltâts di disvilup.”
_
Cuale ise la storie di Daniele Del Negro?
“Daniele al jere un fantat dal paîs, nassût chi a Paulâr intal 1980, e mancjât magari cussì no cualchi an indaûr par colpe di un incident. Al veve bandonât il lavôr par dedicâsi ad implen ae agriculture, cuntun progjet precîs: ricualificâ une aree bandonade e disvilupâle fin a di podê vierzi une latarie aziendâl.
◆ Par chest al veve sielt une aree lassade in pustot une vore dongje dal centri dal paîs, po al veve domandât ai proprietaris dai terens dongje di podê recuperâju e fâ manutenzion dal teritori. Cul timp, al veve cuistât une stale za presinte in cheste aree e al veve fat une grande opare di recupar dal puest, tornant a dâi il sflandôr dai timps che il teritori al vignive curât in maniere slargjade cu la partecipazion di ducj i abitants dal paîs.
◆ Chest nivel di cure al veve par Denêl un fin no dome estetic, ma ancje pratic, stant che al voleve doprâ la sô tiere pal arlevament di cjavris e la vendi formadi, che al è deventât dopo la sô uniche produzion e la sô specialitât. Cul passâ dal timp, la sô produzion e je deventade costante, tant che i siei formadis a jerin domandâts par dut il cjanâl. Cumò, il nestri progjet al previôt di fâ deventâ chel che ai timps di Daniele al jere dome che un arlevament di cjavris, un cjasâl intal sens piu ampli e complet dal tiermin.
◆ Intai ultins agns, Daniele al jere daûr a scomençâ lavôrs par trasformâ la stale intune latarie aziendâl. A vuê, graciis ancje a chest contribût economic de Regjon, o adeguarìn cheste struture par fâle deventâ un cjasâl a ducj i efiets, par che al sedi fruibil pes scuelis e par ducj i turiscj.”
_
Cemût si disviluparaial il progjet dal cjasâl didatic, e cuâi obietîfs volêso tocjâ?
“Mi ocuparai in prime persone, tant che assessôr, di stâ daûr ai lavôrs di progjetazion e adeguament de struture, che o volìn dâ in gjestion plui indenant a cualchi fantat volenterôs dal nestri Comun (o vin vût za domandis), in maniere di dâi la pussibilitât di creâsi une sô ativitât agricule.
◆ Dopo partide la ativitât, ducj i visitadôrs, i turiscj e lis scuelis che le visitaran, a podaran osservâ ma soredut sperimentâ in prime persone lis pratichis agriculis tant che la molte, il stâ daûr ai animâi e cemût tignî net. A vignaran prontadis veris lezions vuidadis par imparâ lis tecnichis di produzion di robis insacadis e formadis.
Par me, soredut par ce che al tocje i arlêfs des scuelis, al è tant plui formatîf osservâ e  “tocjâ cun man” chestis esperiencis, pluitost che limitâsi a studiâlis sui libris.
Di là di chestis ativitâts, vie pal Istât e vignarà fate ancje la lavorazion dal fen e des ortaiis.
◆ Puartâ indenant chest progjet par nô al à diviers fins, il prin al è sigûr chel di ricuardâ Daniele inte maniere plui significative, ven a stâi dant un sens e une continuitât al lavôr che al veve scomençât lui. Par nô al è ancje impuartant recuperâ cheste aree che e à un bon potenziâl e che se no e vignarès abandonade o piês straçade.
◆ Un altri obietîf che nus sburte a puartâ indenant chest progjet al è chel di dâ la pussibilitât ai zovins di Paulâr di fâ un lavôr intal setôr agricul/rurâl cence vê l’oblic di sostignî spesis masse grandis, tant che chês par cuistâ terens, struturis, animâi, e vie indenant. Midiant di chest bant, buine part des spesis e je finanziade za in partence e chest al jude une vorone la persone che e cjaparà in gjestion la ativitât.
Infin, e no di impuartance secondarie, i ten a marcâ che vierzi chest cjasâl didatic al fasarà in maniere di incressi lis risorsis dal paîs.”
__
Ce significât aial vût par te partecipâ a chest progjet?
“Jo o soi pardabon braurôs di vê contribuît a realizâ dut chest e o soi ancje tant entusiast, prin di dut parcè che o soi ancje jo un contadin e mi fâs pardabon plasê che intal cjanâl si vignedi a creâ un avignî in chest sens.
◆ Di là di dut, o cognossevi a nivel personâl Daniele Del Negro, jo e lui o jerin tant amîs, duncje al è clâr che o soi content di podê fâ alc di costrutîf in memorie sô.
◆ O pensi ancje che chest progjet al valorizarà a fuart il nestri teritori, che al à un potenziâl no indiferent.
Il Comun di Paulâr al è di fat un dai pôcs in Italie che a fasin part dai “Bergsteigerdörfer/Villaggi degli Alpinisti”, une iniziative indreçade a promovi in dut il teritori european i Comuns di mont caraterizâts di un turisim “slow” (vâl a dî un turisim che al rispiete la sostignibilitât dal teritori e che al valorize lis zonis di mont, fasint intervents a impat ambientâl bas). Paulâr al è jentrât in chest progjet ai 3 di Avrîl dal 2022.” ❚