Tiere Motus. Storie di un taramot

In chescj dîs a colin i 40 agns di chel 6 di Mai 1976 cuant che il Taramot al fiscà il Friûl. Impussibil contâ dute chê storie, no rivin a contâle dutis lis intervistis e i articui che si lein in chest periodi. E alore o vin decidût di scrivi di un lûc simbolic, li che si conte cheste tragjedie in tancj dai siei aspiets: il museu dal taramot Tiere Motus di Vençon; screât che nol è di tant, intal 2009, che in tancj furlans ancjemò no cognossin. Volût a fuart de associazion dai Comuns taramotâts e sindics de ricostruzion dal Friûl e metût su in gracie dal contribût de Regjon e de CRUP, uficialmentri al sarès “mostre permanente” e no museu par vie des solitis de burocrazie taliane. Culì si conte di cheste tragjedie tremende e di cemût che i furlans a àn cjatât tes lôr lidrîs fondis la fuarce di tornâ a jevâ sù e di resurî ducj insiemi, cuntune ricostruzion che e je stade esemplâr pe partecipazion dal popul e pe vore des istituzions, cognossude come model Friûl.
La mostre e conte il moment plui tragjic e tal timp stes plui nobil de storie moderne dal Friûl dopo de seconde vuere mondiâl. E je dedicade aes vitimis, ai socoridôrs, a ducj chei che a son stâts positivementri solidâi cul Friûl taramotât, ai autôrs de ricostruzion, al popul furlan.
A ‘nd fevelìn cun la curadore de mostre, l’architet Floriana Marino.
Architet, mi diseve che il museu al à dentri dâts e materiâi che a son stâts metûts dongje cun tante fature…
Sì, ogni dât e materiâl al è stât concuardât e metût dongje cun tant lavôr in gracie dal grant sburt de associazion dai Comuns taramotâts e sindics de ricostruzion dal Friûl. Lavôr precîs e fat traviers di tantis verifichis. Chest parcè che e je ancjemò une grande sensibilitât di bande dai furlans su chest teme. Robe che si note ce tant di bande di une persone come me che no je nassude chi. Ma jentrant planc planc in cheste  storie o ai capît parcè.
––
Cuâl isal il percors che o vês ideât par contâ cheste storie?
La mostre e je metude ju in 12 salis a teme: dal cricâ dal dì dai 7 di Mai, ai prins jutoris, al esodi daspò des scjassadis di Setembar, il rûl des istituzions e la storie stesse de vite cuotidiane dal popul da lis tendopolis ai funerâi. Dut cun tantis fotografiis, ricostruzions grafichis, filmâts, materiâi interatîfs.
––
Il museu nol è dome lûc de memorie ma al à il compit ancje di educâ, ise vere?
Propit cussì:  a son gnûfs spazis dedicâts ae formazion e al aprofondiment sientific. Un laboratori didatic al è furnît di imprescj e materiâi che i visitadôrs a podaran interagjî cun lôr, bogns di fâ cognossi ce che al è un avigniment sismic, cemût che si studiin i taramots, e tirâ sù al pericul. ❚
✒ Dree Venier
_______
LA MOSTRE
La mostre permanente Tiere Motus e je li dal palaç Orgnani Martina in vie Mistruzzi n. 4/9 a Vençon (UD)
ORARIS DI VIERZIDURE: di lunis a joibe 15 – 19, di vinars a domenie 9 – 13 / 15 – 19
COST DAI BILIETS: 5 euro, riduzions 4 euro, scuelis 3 euro.