TERITORIS – SLOVENIE. Aquilee, Glesie Mari ancje pai slovens

GLESIE MARI_Ancje la Slovenie e à fat part par secui dal Patriarcjât di Aquilee, che, cu la sô jurisdizion, fin al 1751 al lave dai confins cu la Ongjarie rivant fintremai cuasi a Milan. Par chest, pe Glesie slovene Aquilee e ven ancjemò tignude tant che Glesie mari, li che ancjemò in dì di vuê ogni an a son centenârs e centenârs i slovens che a van in pelegrinaç. In chescj viaçs, inmaneâts di pueste des parochiis, par solit a son previodudis ancje des visitis a Grau e a Barbane, li che a son altris sîts religjôs une vore impuartants.
PAPE_ Sierant il so intervent in ocasion de visite (magari cussì no une vore curte) ae Basiliche di Aquilee ai 7 di Mai stâts, Pape Benedet XVI al à volût saludâ i miârs di fedêi che lu spietavin te place dal Cjapitul doprant lis lenghis feveladis dai popui des 57 glesiis nassudis di Aquilee, vâl a dî furlan, talian, todesc, cravuat e, si capìs, ancje sloven. Pe ocasion, il Pape al à vût dit: “Lepo pozdravljam vse slovenske vernike! Bog blagoslovi vas in vaše družine!” (“O saludi di cûr ducj i fedêi slovens! Che Diu al benedissi voaltris e lis vuestris fameis!”). In plui, jenfri i 40 vescui che a jerin presints pe visite papâl, a jerin ancje i 6 slovens: i arcivescui di Lubiane e di Maribor e i vescui di Koper/Capodistria/Cjaudistrie, Celje, Murska Sobota e Novo Mesto.
RODÉ_ Pal rest, come che al à vût dit il za arcivescul di Lubiane (e cumò prefet de Congregazion pe Vite religjose) Franc Rodé, “il rispiet de diviersitât di bande di Aquilee al rapresente une ecezion te storie: la sô azion e fo basade su di un vêr spirt catolic. Esempli di dut chest al è Sant Paulin di Aquilee, patriarcje tal secul otâf, che al slargjà il cristianisim ai slovens no imponint il batisim ma ben proponintlu. Stant che la sô azion e ve sucès,” al zontà Rodé, “noaltris cristians slovens o vin in ereditât la idee di meti prin di dut il confront e il dialic cun chei altris popui de Europe: chest al à di jessi il nestri compit tant che popul che si cjate tal cûr dal Continent Vieri”.
ZIMULAMENT_ In dì di vuê però i leams jenfri la Slovenie e Aquilee no son dome peâts al comun passât patriarcjâl. Cun di fat, la citât de Basse furlane e à decidût di zimulâsi cun Piran/Pirano, la biele citadine su la cueste adriatiche, za tal 1977. In ocasion de firme dal pat, a son stâts ricuardâts i leams storics che vie pai secui a àn peât i doi paîs: de Ete romane ai secui dai Patriarcjis, rivant po aes dominazions venezianis e austriachis. Dome tal Nûfcent a son rivâts i confins che a àn slontanât i destins di Piran e Aquilee, ma l’inizi dal Tierç mileni al à fat tornâ la storie indaûr, dant la pussibilitât ai lôr abitants di strenzi i leams di un timp.
SEŽANA_ Un altri zimulament par Aquilee (che, di là di Piran, e je za zimulade cu la austriache Maria Saal) al podarès jessi chel cuntune altre realtât slovene, Sežana. Cun di fat, tal Avrîl di chest an al è stât firmât un acuardi jenfri la sezion di Aquilee de Associazion nazionâl partesans de Italie e la Associazion dai combatents pai valôrs de lote di liberazion di Sežana. Chest acuardi al impegne lis dôs sociis a colaborâ adun cjapant part aes cerimoniis inmaneadis par memoreâ la resistence al nazifassisim, cul obietîf di promovi une convivence pacjifiche dai abitants des areis di confin. Come che al à ricuardât il president de sezion locâl de Anpi Luca Moimas, a son za un pâr di agns che lis dôs associazions a àn rinfuartît i contats, tant che la sperance e je chê di rivâ a un gnûf zimulament cun Sežana.
BELI GOLOB_ A Aquilee si fâs ancje solidarietât internazionâl. Cun di fat, te citât che e fo dai patriarcjis e je logade in vie Rome la sede taliane de fondazion Beli Golob (“La colombe blancje”), nassude tal 2002 su iniziative dal cjantautôr sloven Gianni Rijavec cun chê di slargjâ la idee di pâs in dut il mont. Su la fonde de strofe de poesie dal plui innomenât poete slovene, France Prešeren, doprade tant che test dal imni nazionâl sloven, Rijavec, adun cun Elena Ghizzo, Boris Pangerc e Zuleika Morsut (la cjantante furlane sielzude tant che gnove presidente de sezion taliane de organizazion), al à scrit la cjançon “La colombe blancje”, nassude tant che imni universâl de pâs.
Ai 11 di Jugn stâts, juste apont a Aquilee, Rijavec al à presentât adun cun Zuleika il progjet “L’amore è uno solo – Ljubezen je le ena – Love is one”, ae presince dai sindics di Aquilee e di Piran; il progjet al à ancje il patrocini dal President de Republiche slovene Danilo Türk. In plui, al è stât creât il premi “ambassadôr de pâs tal mont”, fin cumò consegnât a pape Zuan Pauli II e al Dalai Lama.
La sede principâl de associazion si cjate a Trnovo dongje Gnove Gurize; par vê plui informazions si pues lâ sul sît www.toast2peace.com, che al è di plante fûr par sloven, talian, inglês e todesc.
ALESSIO POTOCCO