TERITORIS – AUSTRIE. Clanfurt al celebre la gnove leç di minorance

La gnove leç di minorance e proviôt 73 gnûfs cartei bilengâi e diretivis pal ûs uficiâl de lenghe slovene. Daspò di 56 luncs agns, la cuistion storiche de segnalazion bilengâl mancjante e dal ûs uficiâl dal sloven in Carinzie e je stade sierade ai 6 di Lui, cu la leç costituzionâl dal parlament austriac a Viene. Ducj i partîts parlamentârs di diestre a çampe a àn mostrât une unitât esemplâr, lis frazions parlamentârs a àn fat buine la leç cu la ecezion di trê deputâts dai Verts. Tal public al jere presint ancje il governadôr carinzian Dörfler, cuntun grant cartel bilengâl cu la scrite par todesc e sloven »La Carinzie e ringracie pe soluzion!«.
Dopo une consultazion de popolazion carinziane, criticade des organizazions slovenis, ai 16 di Avost e je stade finalmentri celebrade cuntune grande cerimonie te sale dai stemis dal Landhaus di Clanfurt la gnove leç. Sul podi, i prins citadins de Austrie e de Slovenie e rapresentants de minorance: nissun al à pierdude la ocasion di laudâ il »compromès storic«.
Cu la leç costituzionâl il numar di cartei al reste di clap cimentât_ Nissun al è cence taris, ven a dî la uniche imperfezion e je stade il tasê dal president de plui grande organizazion slovene NSKS Valentin Inzko che nol è stât bon di scuindi la sô delusion. I rapresentants de plui grande organizazion dai slovens a àn cirût fin ae ultime dì di modificâ cheste leç. In fin, a son stâts costrets a acetâ il fat che i slovens a adotin gnûfs cartei. Cu la gnove leç costituzionâl, la soluzion e ancje il numar di cartei al reste in clap cimentât, ogni modificazion a pro de minorance e sarà cuasi impussibile.
Dome cualchi ore dopo, tal stes dopomisdì, a vegnin metût sù i prins doi cartei dal totâl di 164 lûcs che a varan une segnalazion bilengâl in Carinzie. Dapardut si sintive il solêf dopo il lavôr finît.
Il governadôr Gerhard Dörfler e il Segretari di Stât Ostermayer (SPÖ) che al jere il cjâf negoziatôr e mediatôr tai ultins mês, a àn organizade une grande fieste ae presince dai cjâfs dai guviers di Austrie e di Slovenie. Ducj si mostravin plui che sodisfats e contents. Dörfler e Ostermayer a àn ancje ricevût lis laudis dai media austriacs e dal parlament, di bande dai partîts politics de diestre e de çampe. Se no fos chê chimiche tra di lôr che a son deventâts amîs, no si sarès cjatade nissune soluzion di compromès. Dörfler si mostrave content, e tant che ringraciament al Segretari di Stât, lu à onorât cul Ordin Nazionâl di aur.
Ancjemò chel istès dopomisdì i politics, adun cui cancelîrs, a metevin man e a instalavin di persone il prin cartel bilengâl a Bad Eisenkappel/Železna Kapla. E di fat, chel cartel cul so non lunc, al à batût ducj i records e al è deventât il plui grant cartel di lûc in Austrie, cu la lungjece di doi metris e la altece di un metri; e di sigûr al è ancje l’unic cartel stradâl instalât a man di doi prins ministris di stât…
Incjadenât a un cartel bilengâl_ Si trate di un moment storic, suntun teren storic. Propit chi a Bad Eisenkappel/Železna Kapla, propit sul confin cu la Slovenie, la lungje dispute e je rivade al colm tal 2006, cuant che il politic di minorance slovene e a vuê unic sindic di minorance slovene in Austrie Franz Josef Smrtnik, si jere incjadenât a un cartel bilengâl par protestâ cuintri il smontaç anunziât dal guvier Haider. Chel al è stât il prin incuintri cul responsabil provinciâl pal trafic dal timp, Gerhard Dörfler. In chê volte, Dörfler al è stât responsabil dal smontaç, vuê invezit dal montaç: tal so câs, un voltâsi te direzion ‘juste’ di 180 grâts.
Tal 2009, Smrtnik al è stât elet te liste Unitât dai slovens (EL) e al è deventât il prin sindic sloven, come che lu clamin vulintîr i media austriacs. Cumò, doi agns daspò, si lu cjate daûr di une bande popolâr, incurnisât di bandieris; denant di lui a son sentâts i plui alts rapresentants dal guvier sloven e austriac, che a dan il benvignût ae gnove leç che e proviôt 73 gnûfs cartei bilengâi, ma ancje diretivis pal ûs uficiâl de lenghe slovene tai comuns di minorance.
Ancje se la minorance slovene si spietave di plui, si à di constatâ un svilup positîf almancul tai cjâfs de popolazion carinziane che ancjemò pôcs agns indaûr e jere dal dut cuintri gnûfs cartei.
Gnûfs progjets di cooperazion cui vicins
Il governadôr al vûl doprâ chest aiar cooperatîf par fusions plui profondis cul vicin meridionâl e ancje par une miôr colaborazion in dute la regjon. Ogni an, in alternance, Lubiane, Clanfurt e Triest, e po une volte ancje Zagabrie, a podaressin rapresentâsi tant che capitâl culturâl de regjon tra lis Alps e la Adrie. Cun di plui, si dovarès – secont il sucessôr di Haider – tirâ fûr la candidature dai trê paîs pe Cope dal Mont di schi. Il guvier di Viene e la Slovenie a domandin la costruzion de seconde galarie pal tunel dai Caravanchis che al coleghe la Carinzie cu la Slovenie.
JANEZ ERAT