TAL ETERE. Ti denunciaRAI

Tal moment che o lin in stampe, la situazion e je ancjemò ferme e nissune decision e je stade cjapade di bande dal Comitât (componût di provincie di Udin, Arcidiocesi, ents privâts e publics, citadins) che al seguìs la cuistion dal furlan te television di Stât. La impression dut câs e je che, stufs di spietâ, si cjapi la strade dal tribunâl. Se, in curt, la Rai no si da une niçade. Se, ven a stâi, no ven firmade la convenzion ad hoc tra Servizi radiotelevisîf regjonâl e Presidence dal Consei dai Ministris. At indispensabil par scoltâ programs in marilenghe, produsûts cun continuitât, de nestre sede regjonâl di riferiment.
William Cisilin, delegât a seguî la cuistion de Convenzion: e someave fate, dopo l’incuintri dai 25 di Zenâr, a Udin, cui “mandarins” di Lorenza Lei.
Il contrat di servizi al è jentrât in vore. Ma su la convenzion o sin fers. O sclarìs: nô o sin pronts, o vin za proponût un test. Sul front Rai, magari cussì no, o sin in spiete di un cualchi segnâl di fum. O vin fat chel incuintri a Palaç Belgrât dulà che nus son stadis garantidis dutis lis buinis intenzions. Dome che, al moment, no vin riscuintri. La Rai nus dîs di vê pazience: ma al è dal 1999 che le vin pierdude. Chi al è 13 agns che si sta disaplicant une leç.
Cemût si isal rivâts al inseriment tal contrat di servizi?
Doi passaçs fondamentâi. Chel de delegazion che e je lade in Comission di Vigjilance a domandâ l’inseriment. E po, chê altre fase – che je stade seguide dal assessôr De Anna cul ex ministri al svilup Romani e la sô segretarie – che e à permetût di rivâ al ricognossiment dal furlan dentri dal contrat di servizi, pe prime volte e pes trasmissions radiofonichis.
Duncje la Rai e garantirà continuitât produtive dome pe Radio?
Intant, fasìn une robe che e je realizabile. E su la radio e je subit realizabile. Po dopo, se la Rai e manifeste interès su chest setôr, nuie al gjave che si fasin intervents pe television. Il nestri obietîf declarât al è dut câs potenziâ la sede di Udin e vê produzions in marilenghe ancje di gjenar informatîf.
Cui paiaraial?
Il guvier talian. Fintremai cumò e proviodeve la Regjon, che, a vuê, e à za dât un milion e 600 mil euros, in ducj chescj agns. Ma la Regjon e à paiât, sostituintsi al Stât. E al è just che al pai il Stât, viodût che lu dîs la stesse leç. Chest nol esclût eventuâi intervents de Regjon.
Tra l’altri, o vin viodût une altre riduzion dai fonts de leç 482, pal 2012, trasferîts dal Stât aes regjons par dâ atuazion ai progjets des minorancis.
Achì a cambin i guviers, ma la linie di riduzion des risorsis pes minorancis no cambie. Lu si veve capît za de programazion plurienâl fate di Prodi. Monti al à fat piês dai predecessôrs. Pussibil che par viodi di tutelâ i dirits des minorancis a vedin di movisi lis ambassadis, come tal câs de Slovenie? Vino di dî al Consei di Europe che in Italie par jessi prudelâts bisugne vê un stât forest di riferiment?
Cualis azions si podaressino fâ?
Al è di riviodi il mecanisim. I nestris parlamentârs a varessin di fâ presint che il trasferiment ae regjon Friûl-Vignesie Julie, uniche a gjestî in autonomie i contribûts, nol è proporzionât ae popolazion. Cjapìn i numars: noaltris, comprendûts i Slovens, o sin 700 mil personis.
O cjapìn sù par jù come i francoprovenzâi che se a son in 10mil. ■
Oscar Puntel