Stefano Codutti, une vite a cjalâ e capî lis stelis

Cemût nassie la sô autobiografie “40 anni sotto il cielo. racconti di un astrofilo”?
“La idee di scrivi chest libri e nas di une mê dibisugne di contâ la evoluzion de mê passion pe astronomie e la mê esperience di cuasi cincuante agns in chest cjamp.
Za di frut insù o ai sintût une atrazion fuarte pe contemplazion des stelis e dai varis fenomens astrâi.
L’episodi storic dal disbarcjament su la Lune mi à fat cressi chest interès e mi àn svicinât di plui a chest mont. Intal libri o conti lis variis esperiencis che o ai vivût, i incuintris, i fatarei, e o descrîf lis vicendis peadis a cualchi avigniment astronomic memorabil, tant che chel che al tocje la osservazion de Comete di Halley.”
_
Che mi puedial contâ de sô esperience di astronom?
“Intal 1978 mi soi iscrit ae A.F.A.M. (Associazion Furlane di Astronomie e Meteorologjie), chê che in chei timps e veve sede a Udin, e o ai lât indevant a jessi membri fin ai prins agns Novante, cuant che, par resons personâls, o ai decidût di lassâ la Associazion. Dopo dal gno trasferiment a Talmassons, o ai cognossût fantats dal puest apassionâts di astronomie, che cun chei o ai tornât a scomençâ a frecuentâ la A.F.A.M. Par vie de distance tra Talmassons e la sede de Associazion, o vin decidût di creâ alc di gnûf inte nestre zone: intal 1992 duncje al è nassût il “CAST” (Circul Astrofii di Talmassons), che o soi stât nomenât so president e che al cjapave dentri in dut nûf membris. O vin screât la nestre ativitât focalizant la atenzion su la divulgazion de sience de astronomie in cualchi scuele elementâr dai paîs dongje (Flambri, Flumignan, Cjasteons di Strade). Dal 1994 indenant si son zontadis tantis gnovis iscrizions: lis personis a vignivin di uns vincj Comuns diferents. Il 2001 al è stât un an decisîf, stant che o vin screât il gnûf osservatori astronomic: ae cerimonie di inaugurazion o vin vût ancje l’onôr di ospitâ la innomenade astrofisiche Margherita Hack. Cul passâ dai agns la notorietât dal nestri Circul e je cressude, in graciis di cualchi lavôr fat intal osservatori (soredut chei che a rivuardin lis cometis) e in graciis ancje ae difusion di internet (il nestri sît al è www.castfvg.it). Dopo cuasi trente agns di ativitât tant che president dal Circul e dentri dal Diretîf dal stes, o ai decidût di lassâ spazi a chei plui zovins par cuvierzi chescj rûi.”
_
Dopo di chest, cemût aial coltivât la sô passion?
“O soi stât contatât di “Astronomitaly”, che al è il prin progjet di disvilup dal Turisim Astronomic in Italie: chel, di fat, al individue i lûcs miôr par osservâ il cîl, e al ufrìs esperiencis di osservazion cun vuidis espertis e fasint doprâ i telescopis.
I socis di Astronomitaly mi àn cirût e invidât a fâ di referent pal Friûl par ce che al tocje l’astroturisim.
Vuê o ai in efiets un patentin di vuide astroturistiche par Astronomitaly, chest al vûl dî che dut ce che al ven fat di lôr inte nestre regjon, si fâs sot de mê vuide.
Chi in Friûl Astronomitaly al colabore une vore cu lis aziendis viniculis, organizant seradis che a previodin cercis di vin cun dongje la osservazion des stelis là che fâs jo di vuide.
O volarès ancje evidenziâ une iniziative che e je partide cuatri agns indaûr in graciis di une mê colaborazion cun Stefano Schirinzi, President dal Centri Studis Astronomics “ANTARES” di Triest; cheste iniziative e je “Star Party”, un radun anuâl di astrofii sul Mataiûr che a vegnin no dome dal Friûl, ma ancje de Slovenie e de Cravuazie.
In cheste ocasion, che si ten intal mês di Setembar, si fâs une osservazion dal cîl che e dure dute la gnot: po dopo, tal dopomisdì, si tegnin conferencis.
E je une biele oportunitât par stâ in compagnie, condividi une passion comune, imparâ alc di gnûf e preseâ la bielece di une splendide localitât dal Friûl.
A chest fin, i ten a precisâ che o soi un grant amant de nestre regjon, e che o soi apassionât de sô storie e de sô lenghe; i ten pardabon tant aes mês lidrîs.” ❚