Spilimberc crosere di lenghis e di musiche cence timp

Spilimberc al torne a partî cu la sô programazion culturâl di Istât cuntun festival che al cjale bande lis lenghis dal teritori e la lôr contaminazion cu la musiche. Al rive ae tierce edizion “Come l’acqua de’ fiumi”, calendari di events in program dai 18 ai 27 di Jugn, inmaneât dal Istitût Fano cu la colaborazion di Regjon, Comun e Fondazione Friuli.
◆ La schirie dai apontaments e je une vore fisse. Si tache vinars ai 18 al Teatri Miotto cu la esibizion dai Spilimbrass e de Orchestre dal Istitût Fano, pe direzion di Enrico Cossio, che cun Giulia Battistella al è ancje il coordenadôr dal festival. Sabide ai 19 prin apontament aes 9 a buinore cu la “terapie di art” tal Palaç de Loze cun Anna Corsini e Elena Urzi: aes 20.30 di gnûf al Miotto, Piera Giacconi, Aurelia Barna e Chiara Segrado a fevelaran de “Rivoluzion de zentilece”, e di cemût che dâ plui vôs aes feminis al pues educâ a une gnove sensibilitât sociâl, cul intervent musicâl di “Le Pics Ensemble”. Lunis ai 21 aes 20.30 Agnul Floramo e il pianist Ulisse Trabacchin a dialogaran su “Dante e la armonie des sferis dal cîl” a Palaç Tadea.
◆ Ducj chei altris incuintris a laran in sene al Teatri Miotto, tacant simpri aes 20.30. Joibe ai 24 l’incuintri “Friuli: terra di frontiere e intrecci linguistici” al viodarà protagoniscj Stefano Morandini, Alessandro Monsutti, Lara Cernic, Fabrizio Colloredo e Dj Tubet, cu lis musichis dal Grup Fisarmoniciscj di Tarcint e dal cuintet di otons SiBrass di Lubiane. La serade e sarà presentade dal diretôr de “La Patrie dal Friûl” Walter Tomada. Vinars ai 25 al sarà spazi pal biolic e musicist Emiliano Toso e pe sô performance “La danza della vita – Translational Music 432 Hz”. Sabide ai 26 la riflession di Marco Guzzi e Pierluigi Di Piazza e varà dongje la esibizion dal Coro regjonâl dal F-VJ. Domenie ai 27, finâl di gale cu la FVG Orchestra direzude di Andrea Gasperin intun omaç ae vision di Ennio Morricone, mancjât za di un an. ❚
Redazion