SPECIÂL – Friul.it, il prin sît internet par furlan

Aromai, cjatâ alc di scrit par furlan su Internet al è avonde facil. Fintremai il sît internet de Regjon Autonome Friûl VJ al à alc di scrit in marilenghe, ancje se al è stât un dai ultins a fâlu.
Ma isal simpri stât cussì? La rispueste e je scontade: clâr che no. Provait a imagjinâsi voaltris cuant che o vês tacât a navigâ te rêt des rêts (o vuate des vuatis…). Dîs agns indaûr (in timps «internetians», une ete gjeologjiche!) us someino avonde? Po ben, za in chê volte al jere pussibil cjatâ alc di furlan su internet.
Al jere il 1996, cuant che te Cooperative di Informazion Furlane, editore di Radio Onde Furlane, si decidè di meti adun il progjet par inviâ la ativitât de radio te rêt telematiche.
INFORMATIZAZION_Chel periodi al jere une vore ferbint par chel che al rivuarde la infomatizazion de cooperative. Un prin pas inte direzion de informatizazion dai procès produtîfs de cooperative al jere stât chel di bandonâ la gjestion mecaniche de metude in onde dal palinsest radiofonic (midiant struments tant che regjistradôrs a cassetis, letôrs a bobinis e v.i., che a compuartavin un grum di ativitât manuâl), par passâ a une gjestion automatizade, doprant softwars specifics pes radios: dute la musiche, la publicitât e lis siglis dai programs a forin digjitalizadis.
In chê ocasion, si tacà a lavorâ ancje par vê une presince tal web cun pagjinis informativis e cuntun spazi dedicât ae interazion cui navigadôrs dal web par mieç di un forum. Al è propit in chel an che al ven regjistrât il domini www.friul.it, cun spazis informatîf su la storie de Radio, su la sô struture, su lis finalitâts de sô ativitât, sul palinsest, e sui colaboradôrs (fig.1 e 2). Un spot radiofonic al comunicave ai scoltadôrs la publicazion dal sît internet, che al è stât il prin – e par tancj agns ancje l’unic – par furlan.
IL BOLETIN_Di li a pôc, al partì ancje un progjet di publicazion di un boletin eletronic par comunicâ cui scoltadôrs/letôrs su tematichis leadis ae ativitât de Cooperative di Informazion Furlane (fig.3 e 4).
Po dopo, a rivarin ancje la publicazion dal telegjornâl (sì, agns prime che al nassès youtube.com!) e la trasmission in streaming dal segnâl radiofonic in internet, rivant a fâ discuvierzi la radio ancje a chei che par cuistions gjeografichis no podevin scoltâle.
Ancje chest progjet al reste un segnâl de vivarositât dal «ambient» de radio, une vore atent ai segnâi di novitât, a capî lis potenzialitâts di gnûfs struments di comunicazion e a doprâju.
Stefano Devoti
________________________________________
La «machine dal timp» virtuâl
Al è probabil che i plui esperts navigadôrs dal web a vedin za vût mût di consultâlu, ma dal sigûr in tancj no lu àn ancjemò cognossût: o stin fevelant de machine dal timp dal web. Une machine particolâr – parcè che e va dome indaûr tal timp – e une vore interessante. La direzion par cognossile e je http://www.archive.org/web/web.php. Chest sît al pues sei definît un museu virtuâl, parcè che dal 1996 in ca – vâl a dî di cuant che a tacarin lis regjistrazions dai dominis internet – al ten une copie des pagjinis publicadis di cualsisei sît internet de rêt. Al è interessant, ma ancje istrutîf par capî cemût che si è evolude la tecnologjie e la comunicazion tal web de gnot dai timps al dì di vuê: al baste meti dentri la direzion web di un sît e in pôcs seconts si visualize l’elenc des pagjinis come che si viodevin tal passât. Un passetimp simpatic che al jude a viodi lis vecjis pagjinis dai nestris sît preferîts.   (S. D.)