SPECIÂL – Altri che pipinot di nêf!

Cui nol aial mai provât, intal mieç di un biel côl di nêf blancje, a fâ sù un pipinot, a meti la carote al puest dal nâs, la siarpe e la barete? Magari cualchidun altri al sarà stât ancje plui brâf, cirint di creâ lis someancis di cualchidun, o ancje cambiant gjenar e cirint di fâ sù un cjistielut! Po ben, chest biel divertiment par cualchidun al è deventât une vere e proprie sfide, une maniere di esprimi la proprie art propit come se al pituràs su la tele o al sculpìs intal len. Tancj artiscj di fat, ogni an si cjatin in cualchi localitât di mont dulà che si davuelzin chestis manifestazions che a àn par protagoniste la nêf. Al è interessant viodi che a son pardabon artiscj di ogni gjenar e di ogni bande dal mont, che a rivin culì par realizâ lis lôr oparis «glaçadis».
O sin lâts a viodi dulà che si davuelzin chestis garis.
LIS GARIS_ Une des plui impuartantis al è il festival internazionâl des sculturis di nêf di San Candido e San Vigilio, in provincie di Bolzan. Al è di dî che za il puest al fevele di bessôl, pe sô bielece cjandide, intun paisaç contornât des Dolomitis. La prossime edizion, intal Zenâr dal 2010, e sarà la vincjesime e a vignaran preparâts, dilunc fûr di plui cjantons des dôs localitâts, cubui di nêf pressade e glaçade cu la aghe. Chi i partecipants a metaran adun la lôr creativitât, intun timp massim di trê dîs, realizant ogni gjenar di imagjin che ur ven intal cjâf. Po dopo a saran i abitants e i turiscj a decidi il vincidôr. E dopo dute cheste fadie? Al è clâr che lis oparis a duraran chel tant fin che no rivarà la Vierte, po dopo di lôr a restaran dome bielis fotografiis.
UNE FURLANE TE GLACE_ Une altre famose localitât che e da acet a une manifestazion simil (Art in ice) e je Livigno, in provincie di Sondrio, chest an rivade ae XIV edizion. Ancje chi a vegnin posizionâts i cubui di glace ator pal paîs, li che si sbrocarà la creativitât dai artiscj. Cun di plui o vin scuviert che a cheste manifestazion, intal 2008, e à partecipât une zovine artiste furlane, Elena Cragnolini, origjinarie di Tarcint, che cumò e vîf e e lavore a Piacenza. Dopo vê fat studis artistics,  si è trasferide ae Academie des Bielis Arts a Brera (Milan); di li e à tacât un percors fat di concors, mostris, ativitâts e manifestazions artistichis diviersis. Intal 2008 e à decidût di tornâ in Friûl par esponi une sô mostre intal comun di Tarcint.
Elena nus conte ancje che e à partecipât a chest concors internazionâl di sculturis di nêf intun grup di trê personis, realizant la idee di une sô amie artiste. «La esperience e je stade une vore positive, sedi intal provâ a tratâ cuntun materiâl par me gnûf che no lu vevi mai pensât come materiâl artistic, sedi tal viodi l’entusiasim de int che e vignive a cjalâ lis oparis». E e continue: «Par lavorâ o vin doprât dome paletutis, une scjale e une piche, no son ametûts altris imprescj».
Si augurìn che Elena e vegni a mostrânus une sô opare glaçade in Friûl, intune di chestis bielis manifestazions di inmaneâ, parcè no, ancje chi di nô.
Venusia Dominici