SLOVENIE. La politiche si zuie il Ministeri pai slovens tal mont

Zûcs politics su la piel des minorancis slovenis, lant daûr ae letare aes regulis dal manuâl Cencelli. I partîts di coalizion Slovenie positive, Socialdemocratics, Liste civiche e Desus a àn firmât a Fevrâr il gnûf pat di guvier, procedint tal contest a un rimpast che al à puartât intal esecutîf trê gnûfs ministris. Ma se lis nominis dai ministris di Sanitât e Ativitâts produtivis a son stadis necessariis dopo lis dimissions di Gantar e Stepišnik, il cambi di vuardie al vertiç dal ministeri pai rapuarts cui slovens intai paîs limitrofs e intal mont al è stât domandât e otignût dal ministri dai forescj e leader dal partît dai pensionâts DeSUS Karl Erjavec. Cence Gantar, ministri in cuote Desus, il partît dai pensionâts al varès pierdût un ministeri e alore al à sigurât la proprie poie al guvier dome in cambi dal puest al vertiç dal dicasteri pes minorancis, che par chel al è stât sielt Gorazd Žmavc. Erjavec al à po dopo pretindût, calcolantlu une funzion politiche, ancje il cambi dal segretari di stât che al colabore cul ministri pai slovens tal forest, fasint sostituî in chel ufici governatîf relatîf l’espert in materie di cuistions di comunitâts minoritariis, Boris Jesih, di Brigita Čokl (za segretarie di stât al ministeri de Sanitât).
Il Slomak (Coordenament des minorancis slovenis in Italie, Austrie, Ongjarie e Cravuazie) intal ultin mês al à plui voltis esprimût il propri pinsîr par vie dai continuis cambis ae vuide dal Ufici governatîf responsabil dai rapuarts cui slovens che a vivin di fûr dai confins de republiche, sotlineant che la mancjance di continuitât e va a pericul di vê incidencis negativis sul lavôr fat dal ent e duncje di penalizâ lis minorancis slovenis. La prime ministre Bratušek che, a Fevrâr, si è viodude obleade a acetâ lis domandis dai compagns di coalizion, e à condividût in maniere palese i dubis dal Slomak e e à nomenât Boris Jesih segretari di stât intal ufici di presidence dal consei cun deleghe aes cuistions relativis ai slovens di di là dal confin e intal mont. Une decision, cheste de prime ministre slovene, che e je stade acetade in maniere favorevule des organizazions di riferiment des minorancis slovenis, ancje ae lûs des anunziadis modificazions de leç sui slovens intai paîs limitrofs e intal mont.
La atenzion che la Slovenie e dediche ai slovens intai stâts vicinants e intal mont e je previodude za dal articul 5 de Costituzion che al dîs che il Stât “si interesse des minorancis nazionâls autoctonis slovenis intai stâts confinants, dai emigrâts e espatriâts slovens e al promôf i lôr contats cu la patrie. I Slovens che no àn la citadinance slovene a puedin usufruî in Slovenie di particolârs dirits e agjevolazions. La leç e fisse la cualitât e la estension di chescj dirits e agjevolazions”.
I rapuarts istituzionâi cu lis comunitâts slovenis intai paîs confinants e intal mont e il finanziament des lôr ativitâts indreçadis al mantigniment e ae promozion de lenghe, culture e identitât slovene, a son definîts plui in detai soredut in risoluzions, leçs e strategjiis dal 1996, 2002, 2006, 2008 e 2011. A nivel governatîf, il secont esecutîf sloven vuidât di Janez Drnovšek dai 14 di Mai dal 1992 ai 25 di Zenâr dal 1993, al veve previodût ancje la figure di ministri pai slovens intal mont e pes comunitâts nazionâls in Slovenie. La cjarie e je stade cuvierte di Janko Prunk. In maniere seguitive, par plui di cuindis agns – ven a stâi fin ae nomine di Boštjan Žekš a ministri (cence tacuin) pai slovens intai paîs vicinants e intal mont, ai 21 di Novembar dal 2008, dade di insediament dal guvier di Borut Pahor – no son stâts ministris incargâts di ocupâsi in maniere esclusive dai rapuarts cui slovens che a vivevin al di fûr confins statâi. A Žekš e je sucedude Ljudmila Novak (dai 10 di Fevrâr dal 2012 fin ai 20 di Març dal 2013); dopo di jê e je stade Tina Komel, sostituide ae fin Fevrâr di Gorazd Žmavc. ❚
Tjaša Gruden