Giacomo Ceconi e la galarie di Bohinj

In plui dal lât di Bled, tra i turiscj furlans che a van in Slovenie al è cetant cognossût ancje il lât di Bohinj, che al è logât tal comun cul stes non. Ma tancj di chescj turiscj no san che cheste localitât, e soredut il cjâf lûc comunâl, Bohinjska Bistrica, a àn un leam storic impuartant cul Friûl. Sul tacâ dal secul XX, di fat, te suaze dai lavôrs par meti sù la gnove linie de Ferade transalpine, a Bohinjska Bistrica al le a stâ cu la sô famee il cont Giacomo Ceconi.
◆ Giacomo Ceconi al nassè tal 1833 intune famee umile di Pielunc e tal 1851 al le a Triest par imparâ a fâ l’assistent muredôr. Intant che al studiave par miorâsi, al lavorave tai cantîrs li che a fasevin lis infrastruturis pe Ferade meridionâl. Daspò jessi deventât muredôr, al metè su imprese di bessôl, lavorant in cetancj cantîrs pes gnovis feradis che a jerin daûr a slargjâsi par dute la Austrie Ongjarie. Si fevelave di lui massime pe galarie de mont Arlberg, che cul so inzen al rivà a vierzi 13 mês prime di ce che si previodeve. Pai siei merits al ve titui nobiliârs sedi de Austrie Ongjarie che dal Ream di Italie.
◆ Il cont Giacomo Ceconi al rivà a Bohinjska Bistrica cu la sô cuarte femine, Josipina Novak – che par nassite e jere slovene – tal Atom dal 1901. Tal mês di Mai dal an dopo, li la imprese di Ceconi e tacà la costruzion de galarie di Bohinj. I lavôrs pe sô ultime grande opare a finirin tal Març dal 1905.
◆ La galarie e nassè tant che galarie de Ferade transalpine. E je logade tra lis stazions di Bohinjska Bistrica e Podbrdo e e je lungje plui o mancul sîs chilometris. Une volte finîts i lavôrs, Ceconi al tornà a Pielunc e li al le indenant a dâ une man pal disvilup de zone.
◆ Tant che inaltrò, ancje a Bohinjska Bistrica inmò in dì di vuê si impensin di cetant che Ceconi al judà tal disvilup de localitât, tai agns che al jere a stâ li. Il so acuedot, par esempli, al è doprât inmò in dì di vuê. Ceconi al donà cetant ancje ae glesie parochiâl di Bistrica, dedicade a Sant Nicolau, tra l’altri comprant vistîts talârs pai predis, ferâi, cjandelis, standarts e ancje statuis pal presepi.
◆ Plui voltis al fasè regâi ancje a la int dal paîs. Par esempli, cuant che la sô massarie Viktorija Oman si maridà cul comerciant Gašper Budkovicˇ, li che Ceconi al leve a comprâ, al ordenà par jê il vistît di gnocis, adiriture a Viene. ❚