Cuatri partîts di oposizion par une colaborazion daspò des elezions dal 2022

In Slovenie cuatri partîts di oposizion tal parlament di Lubiane a àn firmât un acuardi di colaborazion. Cul acuardi, i partîts Lista Marjana Šarca (Liste di Marjan Šarec), Socialni demokrati (Democratics sociâi), Levica (Çampe) e Stranka Alenke Bratušek (Partît di Alenka Bratušek) si impegnin a colaborâ, ancje par che che al tocje i contignûts e i programs. Ma soredut si impegnin – tal câs che a cjapin avonde vôts – a meti adun une coalizion di guvier daspò des elezion politichis de Primevere dal 2022. Daûr dal acuardi, il mandât par meti dongje il guvier al larà al president o coordenadôr dal partît che tra i cuatri al varà tirât dongje plui vôts.
◆ Te sô azion, la aleance e tignarà a ments dîs principis. Prime di dut e smicje a une maniere diferente di frontâ la pandemie di Covid-19, plui eficace e fondade sientifichementri; daspò a plui stât di dirit; a une plui fuarte indipendence di ents e mieçs di comunicazion publics, di organizazions no governativis e de societât civîl; ae bataie ae puaretât e aes disparitâts; a plui invistiments te sience e te culture, e ae fin dai invistiments cence sens tai armaments.
◆ Il president dal partît Lista Marjana Šarca, Marjan  Šarec, al à dit che i cuatri partîts a àn bielzà dimostrât tant che oposizion di jessi bogns di colaborâ, ancje se a àn ideis diferentis.
◆ Daûr dal coordenadôr dal partît Levica, Luka Mesec, la aleance e smicje a infuartî il sisteme sanitari, cun plui solidarietât sociâl, disvilup sostignibil e tutele dal ambient, par une Slovenie europeane e fondade su cognossince e culture. La presidente dal partît Stranka Alenke Bratušek, Alenka Bratušek, e pense che il futûr al sarà cetant condizionât dal debit public. Ancje se ducj i cuatri i partîts si presentaran aes prossimis elezions ognidun cu lis sôs listis e cui siei programs, la presidente dai Socialni demokrati, Tanja Fajon, e fevele di un gnûf inizi, parcè che lis rivalitâts no judin nissun. La aleance e sarà vierte a chei partîts che a condividin i valôrs democratics.
◆ L’acuardi al ricuarde chel dal 2018. In chê volte chei cuatri partîts achì, insiemi cui partîts Demokraticˇna stranka upokojencev Slovenije (Partît democratic dai pensionâts di Slovenie) e Stranka modernega centra (Partît dal centri moderni) a vevin metût adun un guvier di minorance e concuardât une colaborazion cun Levica.
◆ In ducj i cuatri i partîts a pensin che il dirit di metisi adun par protestâ al segni un dirit costituzionâl fondamentâl. Lis protestis cuintri des decisions dal guvier di centridiestre di Janez Janša a son avonde frecuentis. Di bande sô, il president dal consei dai ministris, che al è ancje president dal partît principâl di centridiestre, Slovenska demokratska stranka (Partît democratic sloven), al à dit che al comentarà la gnove dal acuardi une volte che la aleance e sarà di gnûf lade in tocs. ❚