SLOVENIE. Cost de benzine, un probleme ancje di là dal clap

CORSE_ Se ca di nô aromai la corse de benzine e somee inviade viers la cuote di 2 euros par un litri, in Slovenie e à bielzà scjavalgjât une altre cuote psicologjiche, vâl a dî chê dal euro e mieç. Al è capitât cu la fin dal Invier, ai 20 di Març stâts, cuant che la benzine di 100 otans e je vignude a costâ 1,509 euros. Chê altre sorte di benzine verde che si cjate in Slovenie, ven a stâi chê di 95 otans, e à passât cheste cuote un pâr di setemanis dopo, ai 3 di Avrîl, rivant a 1,528 euros.
PRESITS_ In dì di vuê, ancje tal paîs nestri vicin la cuestion carburants e rapresente un probleme economic no di pôc. Il lôr presit, che al ven stabilît ogni 14 dîs di bande dal guvier centrâl e no lassât in man aes decisions des compagniis petrolifaris, al è cressût in maniere continuade. Par esempli, ai prins di Otubar dal 2011 la 100 otans e vignive 1,30 euros par un litri, e tal an prime e jere restade su cheste cifre. Cul inizi di chest an invezit e je tacade la corse cence control, tant che cumò un litri al ven sul euro e 60 centesims. Stes discors pe benzine di 95 otans: ancje cheste e ven aromai sul euro e 60, cuant che vie pal Istât dal 2011 e jere sul euro e 30 e al inizi di chest an a un euro e 38.
2012_Il 2012 si presente duncje tant che un an une vore dificil pai citadins che a àn di fâ il plen pes lôr machinis: tai prins 4 mês dal an il presit de benzine al è za cressût dal 12 par cent rispiet al prin di Zenâr. Al va un tic miôr par chei che a àn veicui cun motôr diesel. Al inizi di chest an il presit par un litri al jere di 1,277 euros, po in Fevrâr al à passât a 1,30 euros e cumò al baline tor cuote 1,35.
CONFRONT_ Dut câs, se si fâs un confront cui presits dai ultins agns a vegnin i sgrisui. Tignint cont de benzine di 95 otans (chê di 100 e je stade introdusude in Slovenie dome tal Jugn dal 2005), tai ultins cinc agns il presit al è cressût dal 58,8 par cent cuintri il 52 par cent dal diesel. Dut chest a pet de cressite dai stipendis, in medie lâts sù dal 18 par cent. Tornant al secul (o ben: mileni) passât, se o lin a uns 15 agns indaûr o viodìn che la cressite in percentuâl pe benzine 95 otans e je stade adiriture di trê cifris: 356 par cent. Pal diesel un pelut miôr, cuntune cressite di “dome” il 337 par cent.
TANICHE_ Une altre curiositât: par jemplâ une taniche di 60 litris di benzine a 95 otans, al inizi dal 2007 a coventavin 58 euros e 40 centesims, ae fin dal 2008 50 euros, in dì di vuê invezit passe 86.
TASSIS_ Di là dal andament dal presit dal petroli a nivel mondiâl, sul cost finâl dai carburants a pesin une vore lis tassis statâls. Di là de IVA (che in Slovenie si clame DDV, Davek na Dodano Vrednost), che pal cont dai carburants e je dal 16,6 par cent, si à zontâ po sù po jù un 32 par cent di tassis. Fasìn un esempli cuntun litri di benzine a 100 otans: metint che al vegni 1,55 euros, il pês de DDV sul cost finâl al è di 26 centesims e chel des tassis al è di 49 centesims. Lassant in bande la tassazion fisse, il presit di un litri di benzine al sarès duncje dome di 80 centesims.
COMPAGNIIS_ Tal paîs nestri vicin a son dôs lis compagniis petrolifaris che si spartissin une largje part dal marcjât dai carburants: la Petrol di Lubiane (www.petrol.si, sît par sloven, inglês, cravuat e serp) e la austriache Omv (www.omv.si, sît par sloven). Sei la Petrol che la Omv a furnissin ancje gas metan (1,03 euros al chilo) e vueli pal riscjaldament (0,84 par un litri). ■
ALESSIO POTOCCO