SIMPRI BOGNS. Tarcisio Mizzau, “Speriments di perfezion”, Udin 2014

“Cheste storie e je scomençade une sere di Lui, intant che l’orloi dal cjampanîl al bateve la miezegnot; e chi di un pôc ancje l’ultin flic al va a finî, parcè che i dîs a son scuasi consumâts. E za il sperâ che mi ‘nt restin avonde par meti in scrit cualchi slac de nestre esperience – juste un fat culì, un ricuart inmò vîf là, cence il contor des complicadis vicendis politichis straviersadis – mi samee une pretese esagjerade”.
Cussì al scomence il libri chel à a vût vint il premi S. Simon dal 2014. Libri dificil di definî. Al vignarès di pensâ al ‘nouveau roman’, une maniere di contâ li che i acjadiments a son secondaris rispiet aes tesis e al ‘flus de cussience’. Cence altri, si trate di une opare origjinâl intal ambit des letaris furlanis, scuasi sperimentâl. La tesi e je une vore clare: la perfezion no je umane, no esist, no pues esisti. E cuant che l’om al pense di vêle rivade e al tache a difindile propit parcè che le considere ‘perfete’, al è il moment che la utopie e devente ‘vencul’.
E cheste tesi e ven esplicitade intes vicendis di trê zovins che si zurin amicizie eterne e che ancje le mantegnin. Fin che al è pussibil: i câs de vite, lis disgraciis a vegnin a dî la lôr, a savoltâ vitis e sintiments e afiets. Tragjediis che, se si cjale ben, a son benzà inscritis intal destin des personis: la tor dal gnûf distributôr di benzine e fas di ‘pendant’ cul destin di Toni, cussì come che il pierdisi intai siums di Pauli al tornarà ae fin de sô vicende. E ancje la malatie dal naratôr e il sacrifici di sô none a fasin riflès su la sô vecjaie.
Se la perfezion no si le rive mai, nol vûl dî che no si vedi di cirîle, anzit! Al è propit chel il fin e il sens de vite, parie cu la amicizie che e je une des robis plui bielis di coltivâ.
Un libri, duncje, complès e articolât. Che  si podarès viodilu ancje tant che un canovaç par ampliâlu intune sorte di saghe, là che l’autôr i ten daûr aes trê storiis dai trê amîs, de infanzie fin ae maturitât e ae vecjaie, compagnant il letôr inte elaborazion de filosofie di vite che e je l’argoment vêr dal libri.
In cont de lenghe furlane doprade, e à reson la jurie di Codroip cuant che e dîs che e je corinte e gjoldibile. Pecjât par cualchi talianisim di masse (parcè ‘controlo’ di p. 39 devential ‘control’ a p. 49?). E pecjât che, intes primis pagjinis, lis figuris di Toni e di Pauli, cualchi volte si confondin, no si capìs cui che al è l’archeolic e cui il musicist.
Ma, si sa, la perfezion no je une robe umane… ❚
✒ Laurin Zuan Nardin