La tace ise mieze plene o mieze vueide? Forsit i numars a puedin miorâ, ma soredut lis scuelis a àn di sburtâ di plui su la cualitât dal insegnament e la informazion aes fameis
E torne a sunâ la campanele, si torne a scuele! Russac sù pes spalis, libris dentri – cumò che diviersis scuelis a àn bandît il tablet se no par esigjencis particolârs, penis, lapis e dut il furniment… e vie inte classe! Cui che al tache une gnove esperience, intai asîi, tes elementârs, mediis, superiôrs, o domandi scuse: scuelis de infanzie, primariis e secondariis di prin e secont grât; cui che al continue il so percors formatîf lant insù cui agns, cui che al invidie chei che lis scuelis lis àn finidis o chei che no àn vût intenzion di continuâ, passât l’oblic scolastic. Po ben, si torne a scjaldâ lis cjadreis, sperant che si tegni ben cjalt ancje il cjâf.
◆ E tache la scuele, no dome pai arlêfs, ma ancje pai mestris, professôrs, operadôrs scolastics e, disìnle dute, ancje pai gjenitôrs. Si torne a tacâ ai 11 di Setembar, e si larà indenant fint ai 9 di Jugn, cun dusinte e vincjeun dîs di lezions pes scuelis de infanzie e dusinte e cinc par chês altris. Cualchi puint al è garantît, no masse, ma nancje masse pôcs par lamentâsi, e al è za pront plui di cualchidun a fâ il cont al contrari par podê dî: ancje chest an e je lade. Ma intant scomencìn, cun entusiasim e soredut cu la voie di imparâ.
◆ No dentri dai plans curriculârs des materiis obligatoriis di insegnament, ma dentri dai plans de ufierte formative dai istitûts che e lu calcolin util, al è l’insegnament de lenghe furlane, come che e previôt la leç taliane 482/99 e chê regjonâl 29/07, par almancul trente oris par an. E sperìn che i aderents a cheste iniziative a sedin simpri di plui. L’an passât, stant al “Dossier su la lenghe furlane tal sisteme educatîf talian dal 2024”, la cuote di adesion e jere dal 80% tes scuelis de infanzie de aree di Udin, coladis al 54% aes mediis de stesse zone, sot il 20% tes primariis de ex provincie di Pordenon e al zero tes secondariis di prin grât tal gurizan. Chescj i numars, a une prime voglade, a dissegnin une situazion no masse vivarose, stant ancje che la Regjon e à stanziât, come che si pues lei tal decret 59109 dai 25 di Novembar dal an passât, un milion e cinccent e passe mil euros pes scuelis statâls, e pôc mancul di sessante mil euros pes paritariis, come sostegn finanziari aes scuelis pal insegnament de lenghe furlane. Masse o masse pôcs, viodûts i risultâts? Al dipent, forsit, se si vûl viodi la tace mieze plene o mieze vueide. Alc si fâs, cui che al rispuint ben, cui che al rispuint mâl, cui che al aderìs, cui no. Cui che al laude, cui che al critiche. E se l’insegnament dal furlan al deventàs obligatori? Indulà, in dute la Regjon o dome di cualchi bande, in chel cualchidun al clame Friûl storic? Domandis pal moment cence rispuestis. Fat al sta che al esist un regjistri dai docents cualificâts a insegnâ il furlan, tra l’altri si è a pene sierade la novesime edizion de “Scuele di Avost” de Societât Filologjiche Furlane, ven a stâi il cors estîf di formazion par insegnants. A esistin struments didatics dedicâts, sussidiaris, dispensis, materiâi digjitâi, oltri a dute une serie di supuarts extrascolastics, come videos e programs radiotelevisîfs pensâts pai piçui, che in cualchi maniere a judin a puartâ il furlan no dome a scuele, ma ancje in cjase. Se la scuele e fos come une cjase, une famee, forsit il furlan al jentrarès in maniere plui naturâl te bocje di grancj e piçui. Ma viodût che il concet stes di famee al è simpri plui discutût, no mi maravei che ancje la lenghe mari e vegni simpri plui lassade di bande.
◆ Fat al è che l’an scolastic passât, come che sigûr al sucedarà ancje par chest an, la ARLeF – Agjenzie Regjonâl pe Lenghe Furlane, e veve inviât la campagne “Dîs di sì al furlan a scuele par to fi!”, a sostegn dal plurilinguisim in etât di scuele. I gjenitôrs, tal at di iscrizion, a son clamâts a cjapâ sieltis educativis di grant significât. No sai, e no crôt, tant che ancje jo o soi un insegnant, che lis scuelis si movin par timp par informâ dai cors di lenghe e culture furlane. Anzit, come che mi è capitât simpri, dentri des scuelis par inviâ i cors dal pont di viste pratic, dut si môf tal mês di Mai, cuant che aromai al mancje pôc ae fin dal an scolastic e dut si ingrume intune maniere di fâ pôre. E si fasin rivoluzions di ogni sorte par chês benedetis trente oris di furlan che, impuestadis in chê maniere, a coventin a pôc o nuie. E ancje se, come che si lei, plui dal 78% des fameis e plui di 33.000 students in Friûl a àn usufruît di chest insegnament te scuele de infanzie e in chê primarie, che e je une biele gnove. Forsit i numars a puedin miorâ, e ancje l’ûs concret dal furlan inte vite di ogni dì, in gracie di impostazion colaborative fuarte e un leam plui strent tra i orghins publics clamâts a promovi la lenghe inte istruzion e i stes istitûts scolastics. Une sinergjie che e pues “fâ scuele”. ❚
