A son formazions musicâls che a nassin dal incuintri di gjenars, ideis e visions. E daspò a son i Rivocs, un doi che al cjape vite de essence stesse de tiere furlane, trasformantle intune esperience sonore autentiche e primordiâl. Nassûts tal Istât dal 2020, i Rivocs – formâts di Laura Giavon e Marco D’Orlando – si ispirin ai paisaçs de lôr tiere, tra cjamps cence fin e cîi ganzants, creant un puint tra nature e musiche, tra lidrîs e sperimentazion.
◆ «Al jere il Lui dal 2020 cuant che lis nestris ideis a stavin cjapant forme. Intun conciert dal Aeson festival, tra tiere, flum, cîl e animis contentis, a nasserin i Rivocs.»
◆ Il lôr progjet si base sul binomi essenziâl e ancestrâl: vôs e percussions, melodie e ritmi, tiere e aghe. Une olme sonore che e font un lengaç popolâr cun influencis africanis e jazzistichis, dant vite a un sound tant arcaic che contemporani. La lôr musiche e je un viaç tra tradizions, contaminazions e improvisazion, dulà che ogni toc al rapresente une conte, une esperience vivude, un barcon viert su la libertât creative.
◆ Ai 22 di Novembar dal 2024, i Rivocs a àn publicât il lôr prin album omonim, un lavôr che al incjarne ad implen la lôr filosofie artistiche. Nûf tocs componûts tra il 2020 e il 2023, cjantâts in diviersis lenghis (furlan, talian, grêc e inglês), che si movin tra il new folk e il new pop, destruturant e elaborant elements de tradizion par inserîju in contescj sonôrs gnûfs. L’album, publicât de etichete furlane Nota, al è stât regjistrât di Francesco Marzona, mixât di Leo Virgili e masterizât di Manuel Volpe, figuris di riferiment te sene musicâl indipendente taliane.
◆ Il percors musicâl di Giavon e D’Orlando al è insiorât di colaborazions impuartantis cun artiscj internazionâi. Laura Giavon, cuntune formazion che e va di Clanfurt e Amsterdam, e puarte tal progjet la sô vôs versatile e camaleontiche, buine di movisi cun agjilitât tra gjenars e atmosferis. Marco D’Orlando, cul so drumming istintîf e rafinât, al pronte il teren perfet par une narazion sonore che e variie tra struturis definidis e moments di improvisazion nete.
◆ «Nus è capitât di nassi al margjin. Li o vevin dut: al jere il soreli, e a jerin ancje tancj nui grîs, e a zuiavin tai cjamps zâi e blu. Si platavin tal cjôt tra la mierde e i purcits, e o sin inamorâts de mestre che nus insegnave lis poesiis a memorie, e o mangjavin il gjelât in place e lis vecjutis nus berghelavin di tornâ a cjase, e nô a lôr ur volevin ben parcè che nus insegnavin a cjapâ sù il sclopit. Al è li che o vevin dut, e li al jere il dut. E cumò, che no vin nuie, o clamìn e o cirìn.»
◆ La origjinalitât dai Rivocs e sta propit inte lôr capacitât di indreçâsi a ogni gjenar di public. I lôr concierts a son esperiencis profondis, dulà che ogni note e ogni bati a rivochin cuntune energjie visserâl, evocant imagjinis, sensazions e ricuarts. La lôr presince sul palc e je potente e autentiche, un dialic continui tra vôs e ritmi, tra tradizion e sperimentazion.
◆ I Rivocs no son dome un progjet musicâl, ma une declarazion di libertât artistiche, un puint tra passât e futûr che al passe intune musiche che e cres tes tieris furlanis e che si slargje viers orizonts gnûfs. Un doi che, cul so prin disc, si conferme come une des realtâts plui inmagantis e inovativis dal panorame musicâl contemporani. E il lôr viaç al è è juste tacât.
◆ Stait daûr ai Rivocs su lis lôr pagjinis tai social Instagram e Facebook (rivocs.duo) e cjolêt il lôr disc in digjitâl, disponibil su Bandcamp, o la copie fisiche, fasint un ordin dal sît de etichete Nota. ❚