La rigjenerazion naturâl, “rewilding” par inglês, e je un procès che al lasse che lis areis ecologjichis a tornin al lôr stât origjinâl; sedi in mût spontani che par volontât dal om. Si trate di fâ tornâ in vite i ecosistemis danezâts o fintremai sdrumâts des ativitâts umanis. In Italie, il concet al è leât soredut aes consecuencis dal abandon agricul e dal dispopolament di zonis une vore largjis. Il so fin al è chel di tornâ a stabilî i ecosistemis che a rivin a autogjestîsi di bessôi, incressi la biodiversitât e sigurâ beneficis a pro des comunitâts locâls. In pocjis peraulis, e je une pussibilitât par imbastî une relazion sane jenfri il gjenar uman, il paisaç e il disvilup sostignibil.
◆ Lis metodichis principâls a son dôs:
– Rigjenerazion naturâl ative, che e domande azions specifichis par tornâ a introdusi speciis estintis, regolâ il cicli des aghis di flums e risiervis idrichis e par favorî la fertilitât di pascui e boscs;
– Rigjenerazion naturâl passive, che e domande di bandonâ in maniere graduâl lis ativitâts umanis danosis, par permeti ae nature di tornâ a colonizâ i spazis.
◆ I motîfs che a àn fât nassi la dibisugne de rigjenerazion naturâl a son sempliçs di capî. Il prin, grivi, al ven dal decjadiment globâl de biodiversitât. Il secont, bon, al ven de prove che tai lûcs abandonâts a tornin a cressi in pôc timp plantis, a rivin bestiis e la nature e torne a vê un so ecuilibri.
◆ I ecosistemis ristabilîts, massime boscs, prâts e teritoris paludans, a conservin un sglavin di carboni. Man a man che la vegjetazion native si rigjenere, lis gnovis plantis a assorbissin la CO2 de atmosfere e, midiant de fotosintesi, le convertissin in carboni. Chest al ven imagazenât tal teren midiant des lidrîs insiemi cu la decomposizion de materie organiche. Dut chest al jude a ridusi la cuantitât dal gas sidrere nocîf inte atmosfere, sbassant cussì i efiets dal cambiament climatic.
◆ Protezi o tornâ a introdusi i erbivars e i predadôrs apicâls, come ancje creâ coridôrs ecologjics pe faune salvadie, a integrin la gjestion des tieris agriculis e la protezion ambientâl. Sul argoment, din un cuc ai obietîfs cjapâts dentri dal Plan Paisagjistic Regjonâl (v. www.regjon.fvg.it).
◆ Massime i predadôrs, midiant la lôr condote e lis interazions cul ambient, a judin a regolâ la popolazion di diviersis speciis, svuincant scuilibris te cjadene alimentâr e simpri tal interès de biodiversitât. Chescj intervents a àn l’obietîf di tornâ a fissâ lis dinamichis ecologjichis origjinâls, spes alteradis o sassinadis par agriculture intensive, urbanizazion incontrolade e disfrutament des risorsis naturâls.
◆ A mont a je la Diretive UE sui habitats, fate buine tal 1992 e inzornade par ultin tal 2023, che e da istruzions pe protezion dai ambients naturâi carateristics e des speciis di animâi e plantis primariis pe lôr conservazion. “Dit tra di nô”, che no sin studiôs, la protezion no varès di jessi dome dentri di parcs naturâi metûts adun a pueste, ma e varès di lâ par man cu la vigjilance des speciis e dal lôr efiet in ducj i ecosistemis, ancje par prevignî pericui e tutelâ le sigurece publiche (v. www.isprambiente.gov.it).
◆ La rigjenerazion naturâl no si limite però a ce che o vin dit. In gjenerâl, e zove ancje tal disvilup des economiis fondadis su la nature (par esempli cu la cressite dal turisim). Midiant di escursions, osservazion dai uciei, fotografiis di paisaçs, si à la pussibilitât di mostrâ la storie e lis tradizions locâls e di dâ lavôr a tante int.
◆ In conclusion, di un faliment uman sul teritori e je vignude fûr une oportunitât straordenarie par tornâ a stabilî la armonie jenfri di nô e l’ambient naturâl. ❚
