Ricuardant pre Marino

Il Vanzeli di cheste ultime domenie di Lui nus fevele di preiere, di cemût vierzi la anime al Signôr, ce domandâ, ma fra dut, mi fermi su la ultime peraule di Jesù: Il Pari vuestri dai cîi no daraial il Spiritussant a di chei che jal domandin? (Lc 11, 1-13). Il motîf di cheste mê sielte al è sempliç: ai 22 di Mai o ai pierdût un amì che o sint ancjemò cun me e no pues smenteâlu.
◆ L’amì al è pre Marino Qualizza (1940-2025), professôr di teologjie, gjornalist, editorialist, conferencîr, om di largje erudizion e culture e di tante sapience e umanitât. Il so “curriculum vitae” si lu cjate tal sît de diocesi di Udin: i siei scrits a son tancj ma si podarès ricuardâ in particolâr “La fede nel Dio cristiano”, Ed. Lint, Trieste, Benecˇija nas dom, Soc. Coop. Most e la rubriche setemanâl “Il teologo risponde” de Vite Catoliche: gotis di une produzion di articui che o podaressin dî cence fin.
◆ Dut chest, a pensâle ben, vuê mi interesse pôc. La domande e je une altre: Marino tes sôs cundizions di invalit al jere om di pâs e seren tal patî. Cemût mai?
◆ Lui tal Otubar dal 2005, tune cjaminade sul Mangart, al jere sbrissât jù par un gravon; i jere costât sîs mês di degjence al Gervasutta di Udin e, ancje se i miedis a vevin fat miracui tor di lui, la vite no sarès stade plui chê di prime; planc a planc si sarès ridusût sentât dut il dì suntune carocele. Al à fat il calvari che altris a àn fat: pre Leo Leonarduç de comunitât di Rinassite di Tumieç, pre Onelio Ciani de Comunitât Piergiorgio di Udin, Pierluigi Cappello nestri poete furlan e altris disabii, zovins e zovinis di ogni etât cu lis lôr fameis: erois e martars che o ai cognossût e che o cognòs.
◆ Di Marino o pues testemoneâ in cussience: ancje tal handicap che lu blocave, i à volût un ben de anime al so popul, il popul sloven de Benecˇija. Pe sô int al à patît e veglât, glotût caluniis e procès, incomprensions e censuris ancje de bande de autoritât eclesiastiche. Lui al à difindût il so popul devant dal vescul A. Mazzocato ancje se il vescul al jere stiçât di vê un contraditori.
◆ In chês zornadis, nol jere in lui dome il patî fisic, ma ancje il sanganâ trement de anime, cuant che a vignivin tocjâts l’onôr, la passion sincire, la dignitât umane e la int che no à non.
◆ Cuant che di sabide di sere de cjase de Fraternitât di Udin lu viodevi partî par lâ a dî messe par sloven a San Pieri dai Sclavons, mi domandavi: “Ce sucedaraial di lui?”. Di fat, al leve bessôl, di Invier te gnot, clopant e çueteant, cun dôs croçulis, sot de ploie e te svintidice. Compagn pe messe de domenie cuant che tal bosc si rimpinave sù pai rivâi e pai tornants di Drencje.
◆ Plui di une volte mi soi dit, començant di me: “Cuâl predi fasaressial lis vitis di Marino par lâ a celebrâ messe par furlan ogni sabide e domenie tes sôs cundizions?”.
◆ Cuâl predi patissaressial pe cause furlane ce che lui al à patît pe salvece de culture de Benecˇija? Che o cognossi jo, dome pre Antoni Beline; ancje lui al à sudât sanc pe dignitât dal Friûl.
◆ La fuarce di Marino, om di pâs fra torments, e jere dentri di lui, te sô anime: dentri di se al cjatave la lûs dal Spiritussant che lu rindeve pazient e savi, simpri pront a ufrî la sô vite tumiade par dâ une man cui che al patìs, simpri viert a chel consei concret che al donave sperance e che al indreçave te vite.
Pensant a lui, mi soi ricuardât di une ebree muarte tal 1943 a 29 agns tal cjamp di concentrament di Auschwitz in Polonie: Etty Hillesum.
◆ Etty ogni dì e cirive Diu sepulît in chel lager e cun umiltât e pazience lu cucave tal profont de sô vite. Dopo cjatât, i diseve: “O fevelarai spes cun te, no ti molarai, no ti slontanarai de mê anime”. In chê risultive libare e infinide di amôr, jê e podeve patî dut, sopuartâ dut e volê ben a ducj, ancje ai siei sassins. In Diu e podeve cjamâsi il patî di chei dongje, gjoldi di une rosute nassude tal pantan fûr de barache e acetâ un destin tragjic volint simpri ben, ogni dì. Il lager al deventave cussì un “paradîs dolorant”, al cjapave un sens e la ufierte de sô vite tal amôr e varès parecjât, e diseve Etty, la gnove societât no violente di doman. Mi cjali dulintor: fossie vere! Vêr al è il nestri faliment. In chescj pinsîrs o met ancje Marino e no dome lui, ma ogni persone che e sa patî te fedeltât dal amôr, tal cidin fin insom, fin da pît. Personis forsit scognossudis ancje tai nestris paîs, oms e feminis che a vivin in bande fra lis spinis de tribulazion e che nus regalin ce che la inteligjence artificiâl tant conclamade no à: la sapience cjalde dal cûr, il viodi il ben ancje tal mâl, il sintî che tal amôr nuie al va pierdût. Personis imbombadis di Spiritussant, vêrs benefatôrs de umanitât. Prime di sierâ chestis notis, o desideri ricuardâ une altre grande persone de Benecˇija: Ivan Trinko (1863-1954) predi, professôr di filosofie, espert des lenghis slavis, politic, poete, compositôr; des sôs oparis dut il Friûl indi à vuadagnât.
Par me, Marino al è par ducj nô l’Ivan Trinko di vuê.
◆ Ai sîs di Mai di chest an al è muart pre Natalino Zuanella, plevan di Tercimont e Savogne; al à vivude dute la vite insiemi ae sô int; lui e Marino a jerin come fradis; il destin ju à unîts in vite e in muart. A lôr e a tancj predis de Benecˇija che a àn scombatût pe sorevivence dal lôr popul, la ricognossince e un avôt: tornait a resurî tal nestri Friûl. ❚