Referendum par vê une Regjon Friûl-Triest, ma no dome: i cuesîts a saran cuatri

A saran cuatri i referendum che il comitât “Tutti per il Friuli” al proponarà ai citadins par lâ a tamesâ la lôr volontât di dâi une gnove muse a cheste Regjon, separant Triest e il Friûl e fasint di lôr dôs provinciis autonomis. Lu conferme il sindic di Rivignan Teor Mario Anzil, che fin dal inizi al è stât il coordenadôr di cheste iniziative che simpri plui furlans a viodin cun interès: “il jutori che nus stan dant in tancj al è il plui biel sburt che si podarès vê”, al dîs Anzil, che al conferme che “intai mês che a vignaran, o larìn a scrivi par ben i cuesîts referendaris. Che a saran cuatri, doi abrogatîfs e doi propositîfs, parcè che la idee dal Comitât e je stade fin dal inizi no dome chê di oponisi a alc, ma chê di costruî”.
ADESION DI BANDE DE SOCIETÂT
La sielte dal Comitât e je stade fin dal inizi chê di viodi se de societât furlane e vignive une adesion di fonde aes ideis proponudis: prime fra dutis, la istituzion des dôs provinciis autonomis, ma ancje la fissazion di un limit aes indenitâts di ducj chei che a son paiâts cun bêçs publics in cheste Regjon. “Un dai referendum abrogatîfs al rivuardarà propit chest aspiet, par eliminâ la pussibilitât che a sedin dirigjents di realtâts tant che Mediocredito o Aeroporto che a vuadagnin plui di Mattarella o di Obama”. “O vin pensât – al sclarìs Anzil – di individuâ tant che stipendi massim chel di 120 mil euros ad an pal President de Regjon. E nissun in ducj i ents publics e tes societâts partecipadis de Regjon al varès di cjapâ un franc di plui”. Chest al sarà un dai argoments dai referendum propositîfs.
ENTS LOCÂI
Il secont referendum abrogatîf al rivuardarà invezit l’asset istituzionâl de Regjon e duncje la leç sui ents locâi che e je za argoment di un ricors di bande di plui di 50 sindics che si oponin ae costituzion des Unions Teritoriâls Intercomunâls. “Chel però che dal pont di viste de scriture dal cuesît al è il plui dificil dai cuatri referendum – al spieghe il sindic di Rivignan – al è chel dulà che si va a proponi lis dôs provinciis autonomis. Parcè che si trate di fâ stâ suntune schede une gnove interpretazion di chel Statût di Autonomie che a son coventâts sfuarçs une vore grancj di tantis inteligjencis par scrivi inte maniere che o podìn lei cumò”.
SLARGJÂ LA RÊT
Ancje il Comitât al à lis sôs inteligjencis: ancje se al scuen fâ di bessôl, cence grandis risorsis, lis colaborazions cul mont de Universitât, dai ordins professionâi e des associazions no mancjin. Ma al covente slargjâ ancjemò la rêt dai volontaris. “Nus sarà util intal moment di cjapâ sù lis firmis”: che no son tantonis (15 mil) ma a van cjapadis sù in poc timp. “O varìn cuintri tancj esponents dai partîts ma il president de Provincie di Udin Pieri Fontanini nus à za sigurade la disponibilitât par judâ te certificazion des firmis, e tancj conseîrs comunâi di listis civichis par sigûr nus judaran ancje lôr”. Obietîf: lâ a votâ tal 2017. E il Comitât al fasarà di dut par rivâ a chest travuart. ❚
Walter Tomada