Tant si è fât e si fâs su Garzoni,
ma e mancje inmò une monografie serie sul “Cjantôr dal Friûl”
In ocasion dal conciert pai otante agns de corâl “I Cantori del Friuli”, ai 11 di Otubar a Cjassà, al vignarà presentât un progjet inovatîf, cun grande probabilitât il prin che al ven realizât in Friûl. Une gnove maniere di insiorâ la nestre capacitât sensoriâl cu la soreposizion di elements digjitâi a partî di une fonde reâl. Realtât aumentade si clame, e in chest câs e cjape dentri il mestri Luigi Garzoni e la sô storiche corâl. A partî di une fotografie in blanc e neri fate in ocasion di un conciert inte Sale Ajace a Udin tal Zenâr dal 1958, midiant di un tablet o di un telefonut, discjamant une aplicazion e pontant il dispositîf suntun banner, ven a stâi une sorte di gjigantografie stampade suntun têl prontât di pueste li de jentrade dal Centri Civic Comunâl, si viodarà animâsi dut ce che al è stât imortalât in chel timp. Il mestri che al dirêç la corâl e lis cjantoris e i cjantôrs che a cjantin, cuntun sens realistic pardabon impressionant, e daûr lis notis di une composizion innomenade di Garzoni che no us disvelìn. Une regjistrazion storiche di un cjant maraveôs, juste par fâus vignî la gole di provâ in prime persone cheste esperience cence precedents. Cussì, prin o dopo dal conciert dal vîf de corâl atuâl, o podarês fâ esperience cu la realtât aumentade viodint e scoltant la corâl dai timps di Garzoni, tornant indaûr tal timp di une sessantine di agns. Provâ par crodi. O disarês, “robis di no crodi”, ma e sarà dute realtât, realtât aumentade juste apont.
◆ Cheste iniziative e je stade realizade di Summergo Lab e Organic Audio in colaborazion cul Comun di Cjassà, cun Dino Garzoni, il pronevôt dal mestri Garzoni, come creatôr digjitâl, Christopher Arnez come programadôr de tridimension, Neysa Rivadineira incargade de produzion, Andrea Peluso ai sunôrs e Emanuele Pertoldi responsabil de digjitalizazion e post produzion audio. La stesse scuadre e à curât i aspiets tecnics dal documentari: “Luigi Garzoni, l’om, l’artist, l’inteletuâl”.
◆ Tignint cont che la “Garzoni reinassance”, a varessin dit i francês, o ben la “rinassite Garzoni”, e à cjapât pît in timps resints, almancul de realizazion dal museu a lui dedicât tal Centri Civic di Cjassà incà, e dal documentari che o ai citât prime (ativitât che e à permetût di scuvierzi un Garzoni inedit che al merete cence dubis un aprofondiment inmò plui struturât), ce che al mancje cumò al è un progjet editoriâl seri sul so cont. A esistin pocjis publicazions su di lui, juste un pâr, cualchi articul, robe interessante ma no suficiente par cognossi ben e insot, come che e merete, la sô figure e la sô opare di om e di artist. Ce che al covente cumò al è un studi che al tegni cont dai gnûfs documents che a son saltâts fûr, in graciis di un lavôr di conservazion menât indevant dal nevôt dal mestri, il dotôr Daniele Garzoni, e insiemi che si meti man al font Garzoni donât ae Societât Filologjiche Furlane, che al ten dentri dutis lis sôs oparis. Al varès di jessi un lavôr struturât, penç, seri, capilâr e il plui pussibil esaustîf, fat di int competente che e cognòs ben la materie e il contest. Un lavôr a plui mans che al puedi tornânus il mestri Garzoni in dute la sô grandece. Come che al merete. ❚
