Radio Onde Furlane. Il cûr al bat a timp di Musiche in marilenghe

Grups e soliscj che a doprin il Furlan cun ducj i lengaçs musicâi: rock, reggae, pop, punk, grunge, hip hop, techno, jazz, classiche e sperimentazions variis. Artiscj che a àn vuadagnât une cierte innomine, dentri e fûr dal Friûl, ma ancje zovins cjantautôrs che a fasin svicinâ il mont di vuê, de tecnologjie, cun chel de art e de musiche.
Al è di chest che us contìn ogni mês. E cumò, rivâts ae fin dal 2016, o metìn in struc dut ce che al è sucedût in chest an.
Par dâ dongje chest an di musiche, miôr di dut al sarès di dâ un cuc a ce che la radio e trasmet. La nestre radio e je chê di ogni furlan: Radio Onde Furlane. Chê che e bat tal cûr dal Friûl, salvadie. Une radio pirate che e trasmet in modulazion di frecuence sui 90 Mhz te plui part dal Friûl, sui 90.2 Mhz in Cjargne e scoltade dai furlans ator pal mont, ancje sul telefonin o tablet, cu la App o dal sît www.ondefurlane.eu.
Radio Onde Furlane di simpri e puarte i scoltadôrs a torzeon tra grups, soliscj, lenghis, musichis, minorancis e nazions cence stât, cun trasmissions che no fasin di mancul di cjalâ in dutis lis direzions.
Dopo la prime edizion dal Radio Gjornâl e la rassegne stampe In dì di vuê al scomence di fat il program Ator Ator. Un apontament zornalîr curât de redazion dulà che, cun ospits in studi o intervistis par telefon, si presentin lis gnovis produzions culturâls furlanis (editorie, musiche, teatri, cine e v.i.) e ancje lis jessudis di un pôcs dai periodics dal Friûl, come La Patrie dal Friûl.
Babêl Europe, invezit al è il program bimensîl dedicât a lenghis, musichis, minorancis e nazions cence stât, dulà che si fevele ancjemò di novitâts discografichis e si scoltin cercis di discs che a rivin de Ocitanie, dal Friûl e de Sardegne.
A proposit di lenghis minoritariis e di musiche in marilenghe, Radio Onde Furlane e je ancje ideadore di Suns Europe, il festival des arts performativis in lenghe minoritarie dal 2009.
A tignî alte la bandiere dal Friûl a Suns Europe o vin vût Doro Gjat, che dopo la jessude dal so disc Vai Fradi al à fat un percors straordenari, puartant la sô musiche e il furlan ator pe Italie. Cul toc Discolce al à di fat vint il vôt de jurie a Suns Ladinia, festival de musiche tes lenghis minoritariis de Europe alpine e mediteranie. Cheste e je stade la semi finâl, davuelte a Moena ai 19 di Novembar, prin di rivâ ae manifestazion che e à rindût il Friûl e Udin, dal 1 ai 3 di Dicembar, ancjemò une volte il cûr de diversitât linguistiche e culturâl dal continent, cu lis sôs sezions dedicadis no dome ae musiche, ma ancje ae produzion audiovisive e ae leterature.
Par cognossi miôr cui che al sta daûr ai tancj progjets in marilenghe, o sin lâts di persone in vie Volturno 29 a Udin tai studis di Radio Onde Furlane. Culì o vin fevelât cun Leo Virgili, diretôr artistic dal festival Suns Europe e artist innomenât par vê sunât cun tancj cjantants, gjornalist in marilenghe e musicist dai Playa Desnuda. Daspò o vin fate visite, in direte radio, ancje a Pauli Cantarut, il president de Cooperative Informazion Furlane, societât editore di Onde Furlane e curadôr e vôs di diviersis trasmissions de radio.
Cantarut al è ancje diretôr artistic de etichete Musiche Furlane Fuarte, nassude tal 1999 de esperience di Radio OF e dal Premi Friûl. Un svant pe musiche furlane e un catalic che al met adun 51 discs dal 1999 a vuê, che nus fâs cognossi artiscj che «a sburtin, a sperimentin, a disfin e a tornin a fâ la musiche e la lenghe furlane. Artiscj che no cjantin pal bêç o par ve nomee, ma parcè che a àn voie di fâ sintî la vôs dai furlans, doprant la lenghe che e ven dal cûr: il Furlan».
La etichete e à produsût musiciscj tant che i Carnicats, Dj Tubet, Madrac, Fabian Riz, DLH Posse, i Parafangos, Pit Ryan & Mad Men Blues. E à publicât la musiche e poesiis dai Trastolons e dai I Luna e Un Quarto. Par no smenteâ Aldo Sbadiglio e la Famiglia Ananas in Vacanza, i LaipLessNess, Dek III Ceesa (ancje autôr de sigle Better Call Abele par une trasmission di ROF). Infin a Setembar si è zontât un toc ae colezion di discs cul 51n album publicât: Lis conseguenis dal Deliri dai Rive no Tocje.
ROF e je la Radio dal Friûl. Che o sedis par strade, a vore o ator pal mont, a ogni ore dal dì, ancje a Nadâl e al Prin dal An, par fâ fieste insiemi, sintonizaitsi su Radio Onde Furlane. Il vuestri cûr al batarà a timp de musiche in marilenghe! ❚
✒ Moira Pezzetta