Pestefun, il ‘grunge’ par furlan che al fâs vibrâ e che al spache, al ven di Codroip

Al è un gnûf sun che al travierse il Friûl. Nol rive des planuris de Basse, ma nancje des ostariis plui imbusadis. Al è un sun ruspi, eletric, che al sgrife e al scjasse: chel dai Pestefun, tercet di Codroip che al puarte il grunge dentri de lenghe furlane. Trê i struments, trê i musiciscj, une vôs che e devente côr di une gjenerazion che no à voie di restâ mute.
◆ Il grup al è fat di Luca D’Angela (vôs e ghitare), Michele Pietrini (bas) e Emanuele Agnoluzzi (batarie). Insiemi a àn cjatât un teren comun tai suns che ju àn fats cressi: il rock american dai agns Novante, i Nirvana e i Pearl Jam, i Soundgarden e i lôr eredis. Ma chel che ju met in lûs plui di dut, e che ju fâs unics, e je la lenghe che a àn sielt pe lôr musiche: il furlan no par folclôr, par nostalgjie, ma parcè che e je la lenghe che a cognossin, chê che e restituìs cun plui fuarce il pês des peraulis e la sgrifade des emozions.
◆ Tai lôr tescj si plate la urgjence di contâ il presint, lis fadiis di ogni dì, la sperance di no rindisi mai. Al baste sintî cualchi viers dai lôr tocs par inacuarzisi di trop che la sielte de lenghe e sedi ancje une declarazion dal lôr volè:
«Nol è l’ultin zîr, si pos tornâ a tacâ,
Nol è l’ultin zîr, i ai cjartis di zuiâ,
A somee che dut il mont a si sta sveant…»
◆ Nol è l’ultin zîr, si pues simpri tornâ a tacâ. E je la vôs di un rock che nol cîr traduzions, che nol à bisugne di filtris. Il furlan al devente culì lenghe universâl: un berghel che al tabaie a ducj, dapardut.
◆ Cui che al à vût la fortune di sintîju dal vîf, al sa che i Pestefun no cirin ornaments: a son essenziâi, crûts, direts. Al Parc Moretti di Udin par UdinEstate, al Festintenda di Mortean, al festival Music in Wonderland di Ariis, la lôr musiche e à cjapat dentri un public curiôs e vari. Zovins che si impersonavin in chestis sonoritâts potentis, adults che a ricognossevin tai tocs il savôr de lôr lenghe mari, apassionâts di musiche che a sintin la vibrazion autentiche di un rock che nol simiote ma che si imparone cun tante naturalece di tante espression, che e reste a ducj.
◆ I Pestefun a son part de “gnove musiche furlane”: un moviment difondût che al ten dongje diviers gjenars musicâi: dal rap di Doro Gjat, al cjantautorât intim di Massimo Silverio, fin a lôr che a incjarnin la muse plui abrasive e profonde. Al è un mosaic che al da vitalitât a une lenghe che no vûl restâ confinade ai mûrs di cjase o aes pagjinis dai libris, ma che e cîr il palc, l’implant, la lûs inceants dai rifletôrs.
◆ Sul front discografic, il grup al sta lavorant al materiâl di promovi: un album al è in jessude pe fin dal an. Diviers tocs a son za stâts anticipâts e sunâts dal vîf, e altris a son singui disponibii su lis plateformis digjitâls, come “Il ben da la reson”, “Forsit no ai voie”, “Il sens di te”, “Chei che no àn mai crodût”, “La grande ilusion” e “L’ultin zîr”.
◆ Chel che al cjape dentri di plui, tai Pestefun, no je dome la cualitât tecniche o la fuarce dai lôr riff, ma la coerence dal lôr progjet. No provin a fâsi plasê di ducj, no van daûr di modis svoladiis. A àn sielt une strade clare, che e je chê che e fonde lis lidrîs linguistichis cu la urgjence dal rock. Dut chest ju fâs autentics.
La lôr musiche e je come un pugn sul taulin: ti sfuarce a scoltâ, a sintî. Nol è spazi pe indiference. Al è un rock che al sa jessi rabiôs e poetic tal stes timp, che al berghele e al cjarine, che al fâs sprofondâ e tirâ sù.
◆ La lôr musiche e je un grunge che si sporcje de tiere furlane, che al puarte cun se il respîr de planure e la ruspidece des pieris, che al sgjave dentri e che nol lasse indiferents.
Forsit al è chest il segret dai Pestefun: vê doprade une lenghe che tancj inmò a pensin che e sedi fragjile, e vêle trasformade intune arme sonore potentissime. Vê dimostrât che il furlan al pues berghelâ, sgrifâ, cjantâ cun distorsions e cu la batarie serade, cence pierdi nuie de sô bielece. Anzit, vuadagnant fuarce.
◆ E alore sì, nol è l’ultin zîr. Parcè che i Pestefun nus ricuardin che fin che e je musiche, fin che e je lenghe, fin che cualchidun al è pront par berlâ ce che al à dentri, la partide no je mai finide.
Tai canâi sociâi dal grup, sedi Instagram che Facebook, o cjatais un diari dal lôr percors: si puedin viodi lis imagjins dai lôr concierts, anticipazions di tescj, videos des provis. Un mût par tignî vive la spiete di un debut che, se al mantignarà lis promessis, al pues pardabon lassâ il segn, dal rock par furlan. ❚