LA STORIE – Une zornade cun Marquart intal Parlament de Patrie

“Spessee, Zuan, che o ai di rivâ adore!” “O soi, siôr pari. Dulà lino?” “Vuê, ai 9 di Avost dal 1388 si da dongje il Parlament de Patrie tal cjistiel di Udin e, cumò che tu sês ancje tu nodâr, come me e come to nono Dree, tu âs di cjapâ man cul mistîr di cancelîr e tacâ a scrivi i ats dal Patriarcje e dal Parlament. Tu sâs che par vincj agns o soi stât cancelîr e segretari nuie mancul che di cuatri patriarcjis: Luduì dai Torians, Marquart di Randeck, Filip di Alençon e cumò di Zuan di Moravie.”
◆ Passade la puarte di Borc di Olee e il domo, a tachin la rive dal cjistiel. Il zovin Zuan al va sù plui svelt dal vieli pari e al rive al porton. “Cui sêstu?” Lu bloche la vuardie. “O soi Zuan, fi dal cancelîr Odoricus Susanna.” “Fasilu passâ – al ven fûr il cjapitani – e bundì sâr Durì. Simpri il prin!” “Ce po, sâr cjapitani – i rispuint sfladassant – a noaltris viei nus tocje dâ il bon esempli. O fâs simpri plui fature a rivâ ca sù. O soi daûr a passâ la incarghe a gno fi Zuan, e lu puarti ae sentade di vuê dal Parlament parcè che i jentri il mistîr.”
◆ Dentri de sale des acuilis, Zuan al reste a bocje vierte. La sale e je grande. E cjape dut un plan dal vieri cjistiel, scure e maestose, cu lis parêts pituradis di turchin e une rie di acuilis di aur. Denant de acuile plui grande, jenfri il standart de Patrie e chel dal Imperadôr, e je la sente dal patriarcje, plui alte di chês altris che a son dulintor de sale. “Ogni scagn – al spieghe Durì – al à la steme di cui che i spiete sentâsi. A drete dal patriarcje si sentin i prelâts, tacant dal Vescul di Concuardie; dopo i deans dai Cjapitui di Aquilee, di Cividât e di Udin; i abâts di Rosacis, di Mueç, di Siest e de Beligne; i prevoscj di San Durì, di San Stiefin e di San Feliç di Aquilee, di San Pieri di Cjargne e insom i delegâts des muiniis di Aquilee e di Cividât.”
◆ “E a çampe?” al domande Zuan. “A çampe dal patriarcje si sentin sù par jù 42 cjastelans che a àn vôs in Parlament, scomençant dai siôrs di Purcie e di Prate che a turni a àn dirit al prin puest, fin al baron di Pierepelose in Istrie. Dute la plui antighe nobiltât furlane. Tu viodarâs vilûts e plumis coloradis, ancje parcè che, come vuê, si profite di fâ la sentade dal Parlament a Udin dongje de grande fiere di San Laurinç di doman.”
◆ “E, pari, ta chê rie di scagns in muse al patriarcje, cui si sential?” “Fi, a son lis Comunitâts, prime lis plui antighis: Aquilee, Cividât, Udin e Glemone; dopo: Vençon, Tumieç, Sacîl, Puart, Maran, Monfalcon, San Vît, San Denêl, Feagne, Davian, Cjanive, Mosse e Midune. Fin a sîs agns fa a jerin ancje chei di Triest.”
◆ Durì al parecje lis cjartis e il libri des ultimis deliberazions sul taulin de cancelarie e i dîs a Zuan di fâ la ponte aes plumis di ocje. E chel, cun la britulute in man, lu stice: “Ma pari, cul patriarcje che al è come un princip, chest Parlament aial cualchi podê o fasial dome bielis cerimoniis?” “Tu fi tu sâs za che il patriarcje, pal cantin de religjon, al è vescul de grande diocesi di Aquilee e ancje metropolite cun 18 vescui sot di lui. Cun di plui, pal cantin civîl, al è ancje duche dal Friûl, dal Cjadovri, dal Cragn, de Istrie e di un toc di Carinzie, come un princip. Dute cheste tiere, che si clame Patrie dal Friûl e che e je sot di lui, e je un dai stâts plui grancj che a sedin, ma ancje siôr di diversitât di int e di podês. Par guviernâlu al è clâr che al patriarcje i coventave un consei di sorestants. Ancje parcè che i oms, i cjavai e i balestrîrs par fâ lis vueris ju metin juste chei che a àn vôs tal Parlament, ognidun pe sô cuote, ancje i abâts e lis muiniis. Cuant che il Patriarcje Marquart, om une vore studiât, mi à dade la incarghe di meti a puest dutis lis cjartis dal patriarcjât, che no si saveve plui ce che i tocjave a lui, ai siôrs e ai munistîrs, o ai vude la ocasion par capî di plui ancje dal Parlament. O soi rivât a meti in filze secui di ats: afits, dirits, tratâts di pâs, concessions, sentencis, contrats, di dut.” “Ce vore penze, pari!” al dîs Zuan. “Pense che o ai cjatade une delibare dal Parlament za dal 1228 e o ai capît che, profitant dai vueit di un patriarcje a di chel altri, al à simpri incressût il so podê fin a deventâ a vuê la istituzion centrâl de Patrie. Il Parlament nol è un consei dal princip, come in altris provinciis, ma une assemblee pardabon politiche, dulà che si decît ogni cuistion interne e cul forest, fintremai di vuere e di pâs, dulà che si fâs buine ogni leç de Patrie, si judichin i delits plui pençs e, nuie mancul, si indrece e si controle ancje il Patriarcje!” Il vieli cancelîr, infogât, al zonte: “Cjale fi chest libri, lis Costituzions de Patrie dal Friûl, metudis jù simpri par ordin dal brâf patriarcje Marquart e fatis buinis di chest Parlament preseât!”
◆ La jentrade dai prins cjastelans te sale e ferme la lezion dal cancelîr Durì, che al ordene a Zuan: “Svelt, cjape sù la liste. Jo ti dîs cui che a son, e tu tu notis la presince: il cont Doimo di Cjistiel, Zuan siôr di Colorêt, Fidrì di Datimis abât di Siest, Nicolau de Portis delegât dal Comun di Cividât, Simon Brocheta delegât dal Comun di Maran…” E po Durì al zonte, sot vôs: “Simpri un fastidi a verbalizâ chei di Maran: a capissin ben il furlan ma a fasin fente di no capîlu, massime là che ur sta ben…” ❚