Onde Furlane a 40 agns aromai e fâs scuele

Documentâ il lavôr fat, inte suaze des celebrazions dai siei prins cuarante agns di ativitât, e meti a disposizion dal public programs che a sedin interessants, plasevui e cuntune lôr utilitât. Cun chescj intindiments, Radio Onde Furlane – che ancje tai ultins mês e je lade dilunc a fâ il so lavôr cuotidian di produzion e di difusion di culture, intratigniment e informazion e a davuelzi la sô funzion sostanziâl di servizi public in lenghe furlane – e à screât za cualchi timp indaûr dôs gnovis seriis di trasmissions.
◆ A scuele cun Onde Furlane e met dongje il risultât di une schirie di laboratoris didatics fats vie pai agns cui fruts e cui fantats di cetantis scuelis dal Friûl. I progjets, coordenâts in chê volte di Adriano Venturini e prontâts cu la partecipazion di vôs storichis de radio tant che Marina Tolazzi, Loris Vescovo, Cristina De Michielis e Michele Polo, a vegnin proponûts intune vieste editoriâl unitarie par cure di Pauli Cantarut, dal lunis al vinars, aes vot e mieze di buinore, e po ancje il lunis e la joibe aes cinc sot sere. Cun di plui, ducj i episodis a son stâts archiviâts in rêt e si pues scoltâju ancje ae direzion https://www.spreaker.com/show/a-scuele-cun-onde-furlane. «In cheste maniere – al ricuarde il diretôr di Onde Furlane, Mauro Missana – a son stâts metûts a disposizion di insegnants e arlêfs tant che materiâi in lenghe furlane pe didatiche a distance».
◆ Cumò… une volte al è il titul comun de selezion dai programs dedicâts ae narative.  Il lunis e la joibe aes cinc e mieze sot sere e, cuant che a saran finidis lis pontadis di “A scuele cun Onde Furlane”, ancje dal lunis al vinars aes vot e mieze di buinore, si podarà tornâ a scoltâ Lis Flabis di Esôf, voltadis par furlan di Pierluigi Visintin, lis Flabis a mirinde di Lussia di Uanis, Lis storiis di Inge e Bach di Luca De Clara, Anìn a nolis di Lia Bront, Mariflabis di Barbara Minen, Audioflabis par cure di Aida Talliente e Michele Polo, Sul troi des contis cun Carli Pup e Barbara Minen e Tieris Antighis, ancjemò cun Aida Talliente e Michele Polo.
◆ Si pues scoltâ Onde Furlane in modulazion di frecuence, sui 90 Mhz inte plui part dal Friûl e sui 90.2 Mhz in Cjargne, e in streaming su internet in dut il mont. ❚