Il leam di amicizie, di colaborazion, di condivision cun pre Josef al è stât lunc e profont te nestre vite di predis. Si sin tant judâts a fâ e a jessi predis, a impegnâsi te pastorâl, te liturgjie, te culture che o sin plui siôrs interiormenti, culturalmentri, spirtualmentri.
Di pre Josef o vin imparât un grant amôr pe liturgjie, pes celebrazions dai misteris fatis simpri cun tante cure, sensibilitât, sobrietât e dignitât, prime forme di catechesi dai fedêi.
Personalmentri, ancjemò zovin student in seminari, di pre Josef o ai imparât a amâ il cjant gregorian cun chel grup di gregorianiscj che al tirave dongje regolarmentri par compagnâ lis liturgjiis. Cjant straordenari di bielece, di mistiche e di spiritualitât, e cjantantlu si capive pardabon che si preave il dopli.
Co o soi deventât predi, di pre Josef o ai imparât a riscuvierzi e a amâ il cjant patriarcjin. Un patrimoni secolâr di melodiis destinadis a lâ inte tombe cui ultins cjantôrs che lis tramandavin oralmentri di secui. Ma lui, te sô sensibilitât profonde al à rivât a salvâ chescj tesaurs prime che lis riformis liturgjichis lis butassin vie dal dut e cun masse premure. Cun pazience certosine al è lât a regjistrâ paîs par paîs, trascrivint il dut in notis. E po al à trasliterât dal latin al furlan in maniere savinte, rispietant il sens liturgjic e la metriche par podê cjantâlis ancje in dì di vuê te lenghe vive dal popul: al è stât un lavoron che al à curât par dute la sô vite fin in chestis ultimis setemanis. Cjants, melodiis, composizions «rivuardosis e discretis, contemplativis e spirituâls, dolcis e delicadis» che lui stes al à definît «spieli de nestre sensibilitât, de nestre anime, dal nestri interiôr».
Chest nol è dut ce che nus à lassât, ma al baste par capî ce grande figure di predi che al è stât pal nestri grup, pe nestre glesie. E la sô muart le sintìn une grande pierdite par ducj: pes sôs comunitâts che di 45 agns al à curât cun sensibilitât, finece e afiet, pal Coro Rosas di mont, pe glesie, pe culture dal Friûl, par nô siei amîs, pai tancj amîs che al à lassât.
di pre Roman Michelot
