Ai 30 di Otubar nus à lassâts il professôr Nereo Perini. Su la stampe locâl a son vignûts fûr articui che a memorein la sô figure di inteletuâl, di docent, di alpin. Al jere un dai ultins veterans de tragjiche ritirade de Russie, e lui, ben che medaie di arint al valôr militâr, al à simpri repudiade la vuere, che no à mai di jessi esaltade.
◆ Fra i tancj aspiets de sô personalitât al è di tignî cont dal so impegn a pro de lenghe furlane. Inte Universitât dal Friûl al à istituide, fra i prins in Italie, une catidre di didatiche des lenghis modernis li che nol à mancjât di meti in lûs la impuartance ancje des lenghis minorizadis.
◆ Al è stât promotôr di progjets sperimentâi de educazion bilengâl talian furlan, ma ancje talian sloven inte scuelis de infanzie. E la lenghe furlane le à valorizade ancje in Canadà, inte Universitât di Toronto, li che al à vût lavorât a pro dai dissendents dai furlans emigrâts. Cui che lu à cognossût e che al à vût studiât sui siei libris, lu ricuardarà simpri cun amirazion. Il so libri, fondamentâl pai insegnants di lenghis “Elementi di glottodidattica”, Padue, 1968, al à in esergo chestis peraulis, par furlan: “Chest libri, scrit tai ultins dîs de sô vite, jo lu dedichi al ricuart di mê mari, fuarte femine furlane”. Mandi, professôr, fuart om furlan. ❚
Nus à lassâts il professôr Nereo Perini
L. Z. N.
