Neutralitât climatiche: obietîf pussibil o utopie?

La neutralitât climatiche, cognossude ancje tant che “neutralitât dal carboni”, e je une sfide che dut il mont al scuen frontâ; di buride e cun cussience.
◆ Lassìn in bande gjeneralizazions e malintindiments (viôt “Lavament vert – Greenwashing” tal numar di Otubar de Patrie) e provìn a spiegâle.
Si trate di rivâ a un ecuilibri tra lis emissions dai gas sidrere disvilupats des ativitâts umanis, soredut la anidride carboniche (CO2), e la capacitât di assorbîju e intassâju.
I ecosistemis a son sì i nestris poçs naturâi di CO2 (boscs e oceans, prin di dut), ma no bastin.
◆ A coventin ancje soluzions tecnologjichis simpri plui inovativis pe cature e archiviazion dal carboni (Carbon Capture and Storage – C.C.S. par inglês).
Clâr al è che al sarà pôc probabil rivâ a metilu dut intes scjaipulis par otignî la paritât, ma al reste fondamentâl ridusilu in dutis lis manieris pussibilis.
Cheste necessitât di cjatâ un belançament, a nivel globâl e je cognossude cul non di “Zero Net” (par furlan “emissions a net, zero taiât”, e si trate di une procedure virtuose za ative ator pal mont.
◆ E rapresente le piere miliâr dai acuardis internazionâi sul clime.
Chel dal 2015 di Parîs, ratificât di 183 guviers – che metûts insiemi a fasin il 55% des emissions globâls –, tignint il riferiment dal nivel di emissions dal periodi storic preindustriâl, al à l’obietîf di limâ la incressite de temperadure medie dal planet a 2°C, cu la sperance di fermâsi a 1,5°C dentri dal 2050. Si pues lei alc su www.consilium.europa.eu. Simpri su chest, une cuistion dolorose e je stade il ritîr dai Stâts Unîts a Zenâr di chest an.
◆ Il fin al pues someâ di nuie, ma pe umanitât al fasarès pardabon la diference tra un mont vivibil, ancje se cun adataments continuatîfs, e un altri sogjet a avigniments climatics grivis in forme stabile, a pierdite di biodiversitât, a crisis di aghe e patiment di fam.
◆ Dut câs, par rivâ ae neutralitât dal clime si à di passâ par une trasformazion profonde dai nestris sistemis di produzion e ancje chei energjetics. Al vûl dî no doprâ combustibii fossii, prins responsabii des emissions di CO2. Butâsi su energjiis rinovabilis come chês di soreli, aiar e aghis. Ma nol baste. Si scuen ancje controlâ e ridusi lis emissions di ducj i setôrs produtîfs che a butin fûr gas sidrere parfin plui pericolôs de CO2, complicâts di gjavâ vie, ma che a puedin almancul jessi mantignûts in ecuilibri.
◆ Va ben ce che a puedin fâ insiemi Mari nature e la tecnologjie, ma prin di dut a coventin trasformazions culturâls, economichis e politichis de societât. A àn di cambiâ i nestris stîi di vite, i sistemis di produzion e di ûs. Al à di cressi il sens di responsabilitât di ognidun.
◆ In definitive, la neutralitât climatiche no je une utopie, ancje se cualchidun al à pôre che e sedi un obietîf inverisimil, tignût cont de resistence economiche e gjeopolitiche dai guviers mondiâi.
Al è sigûr un invistiment a tiermin lunc tai setôrs privâts e publics e al pretint contribûts finanziaris impuartants.
◆ Partint de ciertece che il disvilup uman al à bisugne, prin di dut, de protezion ambientâl, si trate dî vê in man une clâf par vierzi le puarte dal nestri doman. Spesseìn però! ❚