Musichis e danzis di Resie. Si prove la candidature Unesco

Resie e domande il sostegn pe sô candidature Unesco, pontant su la sô musiche e sui siei bai. Par chest, il sindic Sergio Chinese al invide operadôrs culturâi, esperts di musiche e danze, professôrs e dutis lis figuris dal setôr, a  sotscrivi une cjarte (che si pues domandâ midiant la mail dal comun: resia@com-resia.regione.fvg.it) indulà che si cjate une declarazion di firmâ a pro di cheste propueste. La intenzion e je chê di fâ jentrâ il bal popolâr e lis musichis roseanis antighis inte liste des oparis mestris dal patrimoni orâl e imateriâl de umanitât.
Un percors cetant lunc e complicât, tacât tal 2011 e no ancjemò finît, curât fin cumò dal antropolic Stefano Morandini e dal musicolic Roberto Frisano, in buine intese cul comun di Resie e cu lis variis associazions che a divulghin e che a mantegnin il tant particolâr patrimoni musicâl e coreutic dai roseans.
Il percors par proponi une candidature di chest gjenar nol è par nuie facil. Prin di dut, bisugne che il ben imateriâl al rispuindi tal stes timp a cinc criteris: che al sedi un patrimoni culturâl imateriâl, che la sô iscrizion e vedi tant che obietîf la tutele e la promozion a nivel mondiâl, che si pensi a un sisteme di tutele, che la propueste e vedi la poie e la partecipazion de comunitât e infin che il ben al fasi part di un inventari locâl dal patrimoni culturâl.
La documentazion necessarie e je bielzà stade produsude, daûr di un lavôr seri dai studiôs – insiemi cul grup folcloristic e cul côr Monte Canin di Val Resie – concludût tal 2014. A son stâts realizâts une trentine di rilevaments audiovisîfs cu lis relativis schedis di catalogazion BDI (il standard nazionâl di catalogazion dai bens imateriâi). Dutis lis cjartis a son stadis daspò validadis dal Centri Regjonâl di Catalogazion e Restauri di Passarian midiant di un sisteme informatic specific, fin che dute la documentazion e je stade trasmetude al Ministeri talian, che tai prossims timps al varà di individuâ une sole des candidaturis, tra dutis chês talianis che a àn fate domande, di proponi infin al Comitât Unesco. Chest si riunìs ogni doi agns in session ordenarie par determinâ lis gnovis jentradis intal patrimoni mondiâl, in chest câs imateriâl.
Sperìn ben par Resie! ❚
✒ Alessio Screm