MUSICHE. Laipnessless, la novitât musicâl dal 2014

Al va sù sul palc prime un, di bessôl, ben taponât cul capot. Lui al clame dentri il ghitarist: chest al è vistût agns Setante. Po par ultin al rive dentri un alien. Formazion complete. A chest pont il prin al gjave vie il vistît e al reste in blancjarie intime di femine cuntune crôs di pailletes in biele mostre. E si tache a sunâ. Chescj a son i Laipnessless, grup une vôre origjinâl e cul so piçul manipul di fan. A vegnin di Muçane e a àn un brut rapuart «cun dut ce che al è costrizion mentâl». Si viodin pocjis voltis insiemit in conciert, e cuant che al capite no si pues pierdi il spetacul. Parcè che chest al è: performance. Cence pretesis e cence regjistrazions, par cumò. Ma cui isal daûr des mascaris? Il prin, chel che al cjante, al è Rudy Citossi, 34 agns, fonic. Di pôc tornât di un zîr in moto de Indie al Nepal: 12 mil chilometris in 6 mês («par discuvierzi une volte di plui che l’om al è simpri compagn, indipendentementri di dulà che tu lu metis. Al è trist e al è bon te stesse maniere»). Chei altris a son un “toc” dal grup di Muçane vincidôr dal Premi Friûl 2010, i Luna e un Quarto: Jacopo Casadio, 32 agns, ae chitarre, e Davide Sciacchitano, 37, al cuintribàs. «Dut al nas di un gno progjet no tant musicâl, ma di voie di esprimi lis mês ideis» al conte Rudy «fasìno alc insiemit? O ai domandât a Davide e Jacopo. Lôr a son musiciscj bravissims, jo no vevi nancje mai cjantât in vite mê!». Cussì une dì, di une gjite in lagune di Maran, tirant fûr la ghitare e metint adun un pas improvisât sui personaçs dal puest, al nas il grup. «O sin 2 sest dai Leuq e un cjantant stonât» al scherce. E alore cualis sono chestis ideis? «O viodevi ator di me une vore di int “politichementri corete”. Noaltris o fasìn invezit folk “politically incorrect”. Lu fasìn borderline, tabaiant però di vite reâl, de basse furlane, de lagune, di disasi sociâl, dai fats di cronache. E dut par furlan. Par tabaiâ dai nestris argoments la lenghe furlane e je crude al pont just». Lôr a cjalin ator e a cjolin ator: l’alien sul palc, par esempli, al mene pal nâs i avistaments ufo a Mortean. Il puar ET si è dome pierdût, e in font al è un «tip cuiet». Al è po la cjançon dal crocodîl de lagune di Maran, par polemizâ sul ûs de risorse: pandi il “terôr” jenfri i diportiscj par fâur vendi lis barcjis e tornâ a disfrutâ la lagune «come che a fasevin i nestris vecjos», pescjant e fasint canelis. Vilotis acustichis e rimis bussadis si sposin benon cul intent di jessi dissacrants viers i lûcs comuns de furlanetât. Ancje tal non, Laipnessless, pensât su la false rie de peraule inglese “loneliness”. «Solitudin, ma chê dai purcits tal laip» al dîs Rudy «la avilizion des cjasis colonichis furlanis, chel vivi di emancipâsi». E di fâlu cu la vene sarcastiche di une vilote furlane in compagnie di aliens e autorezents. ❚
Natascia Gargano