Morelli e storie di une Contee puint fra lis regjons

Ce che i cjâfs de rivolte di Tulmin no varessin podût savê al jere che, li di dome cualchi deceni, la reazion tai lôr confronts e sarès podude jessi une vore divierse. Inte seconde metât dal secul, cu la inaugurazion dal “bon guvier” di Marie Taresie e di so fi, Josef II, la disposizion di miopie des autoritâts viers lis istancis dal popul e sarès stade rimplaçade di une viertidure plui grande. Chest al fo un dai risultâts positîfs de aplicazion dal pinsîr iluministic ae politiche.
◆ La nature di piçule citât tai confins dai dominis dai Asburcs no impedì a Gurize di ospitâ esponents atîfs e “iluminâts” dal mont leterari e inteletuâl. Clâr che il lôr pont di riferiment nol jere Vignesie, ma Viene. Tra i plui impuartants al fo cence dubi Carli Morelli von Schönfeld, che i dedichin cheste pontade.
◆ A dispiet de sô plene adesion al spirt dal periodi, esprimint une vision liberiste, secolâr e critiche de presince massive de Glesie inte istruzion, al è cognossût soredut par un lavôr che al trate no dal so presint, ma dal passât. Del saggio storico della contea di Gorizia dall’anno 1500 all’anno 1600, publicât tal 1773 e dedicât ae imperadore Marie Taresie, al è il prin lavôr che al ilustre la storie de entitât politiche e teritoriâl che e je il sogjet de nestre colone. La posteritât e à calcolât cheste opare tant impuartante che cualchi citazion – ancje se no rapresente une font primarie – e je stade cjapade dentri tal monumentâl atlant storic e cronologjic dal Friûl dal Corbanese, jessût plui di doi secui dopo.
◆ Morelli al vivè su la sô piel i disvilups e lis consecuencis di tantis riformis taresianis, come ancje il riassorbiment de Contee gardiscjane intal Stât gurizan, tal 1754; fat che al segnà la nassite de Contee Principescje di Gurize e Gardiscje. Al fo daspò cjapât dentri in mût diret tal sfuarç di miorament dal sisteme di racuelte des tassis, mieç secul dopo che Gradnik e i siei seguaçs a vevin cirût, in timps ancjemò no madûrs, di afermâ i lôr dirits. Jenfri il 1764 e il 1770, il storic al lavorà par limitâ il scart e l’abûs, scuintrantsi cun chei che, di chê altre bande, no aprovavin chest tentatîf di modernizazion.
◆ Viazant une vore e visitant dispès Viene, al ve la pussibilitât di cognossi rapresentants dai ambients inteletuâi de citât, e come dimostrazion dal contest mitteleuropean dulà che si moveve, al disvilupà un leam speciâl cun Karl von Zinzendorf. Chest al fo un statist austriac di grant spessôr, sostignidôr dal assolutisim iluminât e governadôr di Triest dal 1776 al 1782.
◆ Morelli al murì tal 1792 te sô citât, cualchi dì dopo vê comunicât al so amì Zinzendorf che al veve finît la espansion dal lavôr dit parsore. La version complete, intitulade Istoria della contea di Gorizia, no si ferme al secul diesim sest ma e inclût dut il periodi asburgjic, fin ae muart di Josef II. Une piere miliâr de storiografie che si varès di tornâ a scuvierzi e consultâ, par “iluminâ” miôr lis carateristichis e lis peripeziis di cheste Contee, puint fra lis regjons. ❚