Mimo Fort, Fidrì e Giacinto – Gio De Luca, Gio Di Qual, “La stravagante maniere cjatade fûr a Udin par risolvi il probleme des epidemiis”, Pasian di Prât, 2020

Dôs storiis a fumuts: la prime e à vint il premi S. Simon dal 2020, inte sezion dedicade a cheste forme gnove di espressivitât leterarie, la seconde e je stade segnalade. Storiis semplicis e curtis, che a stan dentri dutis dôs intes cincuante pagjinis di chest libri. La prime e je di fantasience e e conte di un inventôr che al met adun un missil spaziâl par viazâ intal firmament. Cun lui al va il so amì, un sbilf che al è bon di fâsi invisibil. A viodin di dongje la lune, il soreli e ducj i planets, fin che no rivin intun altri sistemi planetari, li che a cjatin un abitant che al fevele par triestin. Dissens a colôrs, ancje par vie che il colôr al à une funzion specifiche inte trame de conte.
◆ La seconde e je di caratar storic, e fevele de epidemie che, intal 1719, e à fiscât Udin. Une vore di sienziâts a son clamâts dongje dal lutignint venezian, par studiâ la malatie. E veju che a rivin, fevelant par latin e fintremai par grêc. Ognidun al à la soluzion juste, il rimiedi infalibil: gjavâi sanc al malât e soterâlu (il sanc, no il malât), dâi di bevi polvar fin di smeralt o di cuar di stambec, splumâ un poleç vîf e metilu parsore des ulceris dal malât, e v.i. Ma pe soluzion definitive i vûl cjapâse cun cualchidun. Cun cui? Cui ebreus, naturâl! E chest al è un fat storic: pardabon un proclame dal Consei Maiôr dai 26 di Jugn dal 1791 (ripuartât integrâl a p. 43) al proibive a ducj i ebreus di jentrâ a Udin. In chê volte, come cumò, cuant che no si sa ce fâ, al ven comut di pontâ il dêt cuintri cui che al è diferent di nô! Il dissen in blanc e neri al zonte vivarositât e sgrimie ae storie; e i caratars grafics variâts a marchin la prosopoee dai sienziâts plens di se.
◆ Si pues dî che ancje il fumut al à aromai une sô presince significative intal panorame de leterature furlane. Daspò dal Tarvos di Di Sualt, dai Gnognosaurs di Venier, dai Riviei di ingjustri (premi Friûl 2010), o vin cumò chest librut, e al è di pensâ che altris a vignaran, ancje in graciis dal S. Simon. ❚