Memoreâ pre Toni Beline: ereditât vive in int vive

A son dîs agns di cuant che pre Antoni nus à lassâts, timp indulà che si à scugnût usâsi a no cjatâ pui lis sôs Olmis su La Vite Catoliche (si clamave cussì la rubriche che al veve, ndr), ni viodi la lûs piade al prin plan de canoniche di Visepente. Ma chest al è l’aspiet pui prosaic dal om, la presince fisiche. Lant sul trassendent, pre Antoni al reste une vore ben presint. Lis ideis no son smamidis, anzit a son une vore atuâls, come se a fossin scritis îr di sere: un fat che al fâs scrupulâ su la sô capacitât di analisi de realtât. Mai soluzions za prontis, ma provocazions a cirî cun atenzion une leture atualizade dal mont indulà che o vivìn e de nestre relazion cun chel stes. Cussì, ta chestis celebrazions di pre Antoni nus reste la sô memorie come om e lis sôs ideis profetichis che si cjapin sot braç. La memorie e je chê afetive de int che lu à cognossût e vivût; lis intuizions a son il sô passepuart pe storie, la sô imortalitât in tal mont dai oms.
Une serie di iniziativis in chest sens si son metudis dongje, cun tancj protagoniscj de vite culturâl furlane, e di tante int. O vin di fâ atenzion al concet di celebrazion, parcè che si preste a une strumentalizazion facile. Pre Toni stes al citave pre Checo cuant che al diseve che il podê ti da cuintri; cuant che nol rive, ti compre; se nol rive nancje li, ti dopre. Pre Antoni al reste un pont di riferiment fuart par cui che lu lei sedi cul cûr che cul cjâf; al sburte ae coerence fuarte, indulà che il compromès nol pues jessi une scuse par stâ cun ducj, ma par sielzi cun fuarce une posizion radicâl, ma mai fondamentaliste, sierade. Par chel, il pericul di un pre Antoni “ecumenic” che al va ben a ducj al è un pericul reâl.
Il troi di chês olmis, di chel cjaminâ intal mont, nus è stât mostrât, che dîs agns dopo al reste une ereditât cjapade sù di tancj di lôr che no à di jessi doprade par metile tune scansie di un museu, ma che e resti come che lui, o crôt, le vedi simpri interpretade: vive in int vive.
✒ Mauro Della Schiava