MEDITANTLIS TAL SO CÛR. L’amôr al vinç ancje la muart

No sai ce che Novembar al pues dî a lis gnovis gjenerazions, ma par nô, Novembar al è il mês des zornadis dai Sants e dai muarts, dai ricuarts di chei che par simpri nus àn saludâts. Al è il mês de eterne domande: si tornarìno a cjatâ?
Agns indaûr cuant che o jeri plevan a Stolvize di Resie te gnot dai Sants la int e lassave ancjemò impiade la lûs te cusine e e jemplave di aghe i seglots, parcè che in chê gnot a tornavin in cjase i defonts e a vevin di cjatâ la lûs di chest mont e l’aghe par distudâ la lôr sêt. Dut chest al jere imagjine e simbul di un alc che al è ben plui profont: tal lum de memorie a podevin rivivi cul peam dal afiet.
E je la memorie che e unìs vîfs e muarts e ducj nô int fasìn esperience.
O cognòs int che e contemple serene ce che al è stât; personis che a cjapin coragjo intal cimiteri; altris che a àn siums mistereôs che ju judin a lâ indenant.
Se o smenteìn il ricuart, i nestris defonts a tornin di gnûf a murî e nô stes o distruzìn un toc de vite passade cun lôr. Ricuardâ e je une esigjence dal spirt e e vâl in cualsiasi etât, ancje pai fruts, par chei cence Diu, par chei che a sostegnin: dut finìs sot doi  metros di tiere.
Vite e muart a son come dôs paralelis: si compagnin, si cjalin, si incuintrin tal infinît.
O sai di cjacarâ di robis plui grandis di me parcè che no sai fint dulà che e je realtât o fantasie, esigjence e ilusion. Par chest, e ancje in chest, al di sore di dut o preferìs fidâmi de peraule di nestri Signôr: “Se il grignel di forment, colât in tiere, nol mûr al reste di bessôl. Ma se al mûr, al bute une vore” (Zn 12,24). I nestris muarts a continuin in cualche maniere a “butâ”, a florî e a nudrî.
Mi fâs rifleti ancje la peraule di Crist te ultime cene: “Chest al è il gno cuarp, che al è par vualtris; fasêt cussì in memorie di me” (1Cor 11,24). Nus à racomandât: no stait a smenteâsi di me.
E in chel “memoriâl” dal Signôr e je dentri la sô passion, la sielte di murî savint che l’amôr al è un valôr cussi grant e assolût che nancje la muart no lu distrûç.
Restìn peâts ai nestris defonts tune serene e fiduciose memorie: Crist tal so afiet nus insegne che l’amôr al vinç ancje la muart.
pre Tonin Cjapielâr