MEDITANTLIS TAL SO CÛR. La ricete vere par ducj

A jerin i agns cincuante-cincuante cinc cuant che mê mari, vude te sachete une palanche in plui, si è cjolte il lusso di comprâ une cjadreute; cussì di sere vie pal estât si sentave un moment sul puiûl di cjase che al deve jù su la strade dal paîs. Di li e cjalave, e polsave.
Mi è vignût tal cjâf chest fat banâl de mê infanzie par vie che in chescj timps di grancj cambiaments mi cjati ancje jo tun cjantonut dal mont a viodi ce che al sta sucedint. E mi dîs: mê mari, che e veve fate la seconde elementâr, ce podevie capî dal grant mont? E ce puedio intindi jo dai savoltaments economics, politics, finanziaris, culturâi, multimediâi che o stin vivint?
Mi cjati sprovedût e o podarès dome contâ ce che o stoi provant dentri di me, scoltant ce che al sta sucedint, sore dut in Italie, tor ator di me.
Cuant che o jeri piçul, nus insegnavin che lis divinitâts de mitologjie greghe a gjoldevin suntune mont clamade Olimp. L’Olimp talian al sta slacant di ogni bande; la mont si è spacade e e bute fûr ogni sorte di porcariis e di violencis, di tangjents, privilegjos, interès, imbrois, burocrazie scandalose, distruzion dai piçui e spregio dai onescj; o dîs il vêr: mi àn ingomeât.
O soi strac ancje des notiziis che nus vegnin dadis; scoltant o leint  mi somee di jentrâ tal palaç di veri o dai spiei li che une imagjine e devente mil e li che une volte dentri no tu sâs plui li che tu ti cjatis par vie che dutis lis jessudis a son in contemporani justis e sbalgjadis. Mi convinç simpri di plui che dut al ven pilotât: no esist veretât, ma dome veretât manipolade. Ce tant che a àn di ridi in alt sore la nestre ingjenuitât!
O vivìn une parvence di democrazie, une libertât plui che vigjilade, une informazion orchestrade… E nô o sin come fueis vultulinadis dai aiars che no savìn dontri che a rivin e dulà che a van. Cheste in grande part e je la Italie di vuê e il Friûl si cjate inpeolât in chest landri plui che vergognôs.
In alt si ritegnin studiâts, inteligjents e sans e a dan ricetis a chei altris. La ricete vere par ducj, e je dome une: par cambiâ la societât, o vin di medeâ prime di dut nô stes; nissun al vuarìs par un altri; ognidun al scuen pensâ a vuarîsi se.
Al è vêr che mê mari, sentade su la sô cjadreute, no à mudât lis tragjediis dal secul passât; però, nancje il mont nol à rivât a studâ la armonie e il benjessi che a jerin dentri di jê; se no à salvât il mont, e à salvât se stesse e la famee. Te societât nevrotiche di vuê o sin ducj rots ta la anime; tornìn al spirt, a la peraule dal Vanzeli par salvâ nô stes e chei dongje: chel che al salve se stes o une persone, al salve il mont intîr. ■
pre Tonin Cjapielâr