MEDITANTLIS TAL SO CÛR. Il troi de memorie

O soi nassût fra lis monts e di piçul in sù o ai imparât lis regulis di chel che al cjamine su pe mont: mai fâ il pas plui lunc de gjambe, mai slontanâsi dal troi e, cuant che e je fumate, stâ fers li che si è.
Mi soi impensât di chestis normis scoltant il tam tam mediatic pai cent e cincuante agns de unitât di Italie e pensant a lis valanghis di peraulis che in cheste ocasion nus sumierzaran. Par chest, par no restâ soterât, mi tocje prin di dut fermâmi cun me e cjaminâ sul gno troi, chel che mi ven dât des memoriis de vite.
Un fat al è clâr: di piçul, tal paîs, no ai mai sintût a cjacarâ mâl de Austrie, che anzit la int e stimave il bielstâ e il mont culturâl di chel popul.
Te vuere dal 1915-1918 lis fameis dai nonos a finirin part in Sicilie e part in Toscane; un gno nono no savìn li che al è muart e li che al è stât sapulît.
Un gno cusin al à fate la vuere di Albanie e al è tornât segnât par dute la vite come la plui part dai soldâts che a jerin stâts mandâts in chei landris.
De vuere dal 1940 o ricuardi i bombardaments e o puarti cun me lis imagjins dal paîs distrut, ridusût a grandis busis di bombis e a grums di maceriis.
Dopo de vuere, gno fradi al varès cjapât la strade des Americhis e mê sûr chê de Svuizare. Gno pari, cuant che o jeri frut nus diseve: Lait un in Americhe, un in Afriche e un in Australie ma no stait a fermâsi culì».
Cheste e je la imagjin di Italie che jo o varès di celebrâ e no pensi di jessi stât il plui disfurtunât di ducj i furlans!
Pape Zuan Pauli II prime dal an sant dal 2000 al à cirût a mût so di salvâ la muse de glesie, domandant perdon di ducj i sbalios dai secui passâts.
Chestis a saressin lis celebrazions di fâ: une grande revision par rimediâ a delits cence fin e par cjapâ une strade gnove començant de cuistion etiche e dal federalisim. Al diseve Gandhi ai Inglês: Voaltris o vês sbaliât; al limit, o vin il dirit di sbaliâ ancje nô».
Nô furlans o sin stâts cjapâts dentri tal stât talian part tal 1866 e part tal 1918; duncje cumò no vin nissun motîf di fâ celebrazions e pal 2016 dut al è di viodi e di valutâ.
Al obietarà cualchidun che no si pues fermâsi a la memorie di une persone par sdrumâ la storie di un popul. O rispuint che cjalant ai disastros sucedûts, lis tragjediis dai ultins cent e cincuante agns a superin di grant lungje i beneficis di cheste Italie pastiçade.
Par chest e par tancj altris motîfs, jo no jes dal gno troi e no mi buti te fumate.
Te memorie dai patiments dal nestri popul, us invidi a fâ compagn.
pre Tonin Cjapielâr