MEDITANTLIS TAL SO CÛR. Emigrants vecjos e gnûfs

Il mês di Avost al ripuarte tai nestris paîs i fîs e i nevôts di chei furlans che a jerin partîts a cirî in tiere foreste ce che la Italie ur dineave culì: il lavôr, la palanche e la dignitât. A levin come che a podevin e si adatavin a ce che a cjatavin; no domandavin dirits, a lavoravin il dopli di ce che a dovevin, a sparagnavin cence padin. Intal passâ dai agns, cualchidun al tornave in paîs, altris invezit si adatavin a vivi tal forest, a metevin sù cjase lontan ancje se ur restave la nostalgjie in cûr. Chê nostalgjie trasmetude a fîs e nevôts che cumò, aromai simpri mancul, a tornin par cualchi setemane in Friûl.
Lis gnovis gjenerazions nancje no san ce che al voleve dî: «Libars di scugnî lâ…».
Timps di une volte, si disarès, ma ancje timps di vuê; di fat, la emigrazion no je finide, e je dome gambiade e forzit o sin plui emigrants nô vuê che i nestris vecjos di une volte.
Di fat, pur vivint culì, la cjase e sta deventant une locande, la comunitât un aglomerât, i aveniments di chei dongje, un alc che no nus tocje. O sin forescj tal paîs e il paîs nus è forest a nô.
La nestre tiere e à une configurazion semplice e clare che si clame Friûl e si precise tune gjeografie, storie, antropologjie e vite di comunitât. Scjampâ di chestis coordinadis al vûl dî emigrâ viers isulis lontanis li che, cence lidrîs, o sarìn di ducj e di nissun.
La nestre tiere e je ancje la pâs che e ven dal vê cjatât il sens profont de vite. Il sens de vite nol dipent des modis, des palestris e des discotechis, ni dal cori di Sapade a Lignan, ma, cuant che al è, al è dentri di nô. Nô no sin plui oms parcè che o viodìn in timp reâl e in contemporanie une partide di balon culì, a Parîs e a Berlin e il sens de vite nol è tal ingrumâ simpri di plui novitâts e emozions, ma tal savê donâ se stes tai propris dovês pal ben di ducj.
Vê une tiere, al è ancje vivi tune spiritualitât. Il mont nol starà in pîts cence une anime, come che al murarà se vuarfin di art, di musiche, di poesie.
Pierdi la spiritualitât, come che al sta sucedint, bandonâ il significât ultin de vite che al è Diu, tirâ sù une gjenerazion di fruts che no cognòs la puarte de glesie, al vûl dî dome emigrâ viers templis e dius che dapît si clamaran podê, palanche, idolatrie dal cuarp, banalitât, profit e violence. La tragjiche storie dal secul passât lu dimostre.
I nestris vecjos a emigravin par sustignî i valôrs de persone e de famee, par vê un avignî plui seren. No volarès che la nestre gjenerazion e emigràs dome viers oceans incuinâts di petroli e viers tieris velenadis di ogni pesticidi.
I fîs e i nevôts dai emigrants, tornant in paîs, nus visin che la nostalgjie de proprie tiere e je tal cûr dal om.
Cirìn di jessi ospitâi cun lôr, ma cirìn ancje di no deventâ nô stes, tal non di une stupide modernitât, chei eternis emigrants che, cjapadis pistis falsis, si pierdin tra ilusions cence tignince.
pre Tonin Cjapielâr