Mariscuele: plui di 140 insegnants par fâ il pont su la marilenghe a scuele

Il President de Provincie di Udin lu à definît un dai apontaments plui impuartants di dut il calendari des iniziativis pe Fieste dal Friûl.
“Mariscuele” nol è nuie altri se no il classic esempli di progjet nassût dal bas: al inizi dal an scolastic 2012-2013 cetancj insegnants che si son cjatâts la novitât dal Plan Aplicatîf de Sisteme pal insegnament de lenghe furlane a son vignûts li dal sportel linguistic di Codroip a domandâ consulencis, materiâi didatics o progjets tematics di puartâ indenant tal program e cussì, scoltant lis esigjencis e lis dificoltâts di ognidun si è pensât di inmaneâ la prime ocasion di incuintri, confront e inzornament su la marilenghe a scuele. Il progjet, ideât dal Sportel furlan dal Comun di Codroip al à subit vût il consens dal Istitût Comprensîf di zone, diret de dot.e Patrizia Pavatti che tai ultins agns e je stade in Regjon une des protagonistis de gnove organizazion didatiche dal furlan, de Societât Filologjiche Furlane, che jessint Ent acreditât dal Ministeri pal inzornament dai insegnants e à podût garantî une atestazion a ducj chei che a àn partecipât a la zornade di studi e te ocasion e à ancje presentât il so prin eBook: “O impari il furlan” par iPad. Cun di plui, gracie ae poie de Provincie di Udin e, massime, dal President Pieri Fontanin che al à sostignût cun vivôr la necessitât di fâ il pont de situazion, il Progjet Mariscuele al à podût jessi inviât.
Cussì sabide ai 5 di Avrîl, te suaze des manifestazions pe Fieste de Patrie dal Friûl 2014, tal teatri Benois De Cecco di Codroip si son cjatâts plui di 140 fra mestris di scuele de infanzie e primarie, professôrs de secondarie di prin grât e dirigjents scolastics plui tancj uditôrs interessats al argoment.
Dopo i salûts dal Sindic, dot. Fabio Marchetti, e dal President de Provincie di Udin, On. Pieri Fontanin, il seminari, “Marilenghe & Mariscuele. Riflessions par un percors condividût e integrât”, al à viodût un program une vore impuartant e improntât a un sens pratic, indreçât a la soluzion di problemis e al aprofondiment di plui aspiets dal insegnament de marilenghe. Coordenâts dal Prof. Federico Vicario, president de Filologjiche, si son alternâts esperts di didatiche, dirit e linguistiche come Pierino Donada, William Cisilino, Patrizia Pavatti, Paola Cencini, Rosalba Perini, Antonella Brugnoli e Giorgio Ziffer. Fra un intervent e chel altri si è lassât spazi ae presentazion di nûf progjets, fra i cent e passe segnalâts al sportel di Codroip da lis scuelis dal teritori di lenghe furlane,  sielts pai aspiets particolarmentri inovatîfs come l’ûs des gnovis tecnologjiis, l’interdissiplinarietât o il plurilinguisim.
Insiemi cul seminari si è tignude ancje la prime “Mostre de didatiche in marilenghe” che e à viodût l’esposizion dai materiâi fats des scuelis (libris, zûcs, calendaris, cd, dvd…), che cumò a son a disposizion di ducj i interessâts li de biblioteche di Codroip, ma ancje l’ufierte de didatiche in furlan che e ven di fûr de scuele come i laboratoris o i imprescj didatics di ents, Universitât, cjasis editoris, professioniscj e associazions.
Une propueste significative e à sierât i lavôrs: la istituzion di une Zornade de Marilenghe che e meti adun il mont de scuele une volte par an, sperìn che il progjet Mariscuele al vedi viert cheste strade di confront e inzornament continui… ❚
Antonella Ottogalli