Mari e fie a crein i ‘Scarpets di Lussy e Dali’

La gnove anade e à puartât la nassite di une gnove ativitât in Cjargne: la buteghe dai ‘Scarpets di Lussy e Dali’. Ancje se o sin a Denemonç, disìn daurman che la tipologjie dai scarpets e je chê di Paulâr.
◆ “Fâ i scarpets – e conte Dalila Craighero, zovine di 31 agns – e je une art tramandade di gjenerazion in gjenerazion; za mê none e mê none bis a fasevin scarpets! Mê mari, Luciana, e à cjapât in man cheste art soredut par judâ sô agne Pola di Paulâr e cussì, a timp pierdût, e à tacât a fâ scarpets. Jo mi soi metude in propri chest an vierzint la partide IVZ, cu la idee principâl di creâ un sît internet dulà vendi i scarpets no dome in Cjargne, ma ancje ator pe Italie. Disìn che o cîr di promovi in clâf moderne i nestris prodots doprant i mieçs “socials” dulà che, dispès, mi cjati a condividi tocuts di videos mostrant, par esempli, cemût che i straponç lis suelis dai scarpets. No crodevi di vê tancj zovins de zone che a mi stan daûr… a son mistîrs che il plui des voltis no son plui cognossûts… ancje dome ricamâ une rosute cuasi nissun lu fâs plui.
◆ Mê mari, cuant che e jere piçule, e faseve scarpets cun mê none bis che i diseve ‘ricame la stele alpine’, alore jê le faseve e, dopo vêje fate viodi, la none bis i diseve ‘disfe e torne a fâ!’ Dut chest al faseve part di une sorte di educazion. Tes cjasis une volte lis feminis a savevin cusî e ricamâ. Cumò invezit no si fâs plui. Nô i nestris scarpets ju fasìn come une volte. O vin volût mantegni la tradizion di fâ la solete di peçots. Par tignî un presit competitîf e ae puartade di ducj, invezit di pontolâ a man o doprìn une machine Singer dal 1908 che a rive a bati un biel spessôr. Sot si incole la suele di gome di cjaliâr; une volte a fasevin la suele cul coperton di biciclete.”
◆ A vuelin cirche 15 dîs par fâ un pâr di scarpets.
◆ “Par solit – e va indenant Dalila – i scarpets ju vent vie internet. I ai stât daûr un grum di mês par fâ un sît avonde sempliç e imediât indulà che un al pues sielzi, cun pôcs passaçs, il so scarpet e ordenâlu in maniere virtuâl. O vin la pussibilitât di personalizâ i scarpets lant daûr aes dibisugnis di ognidun. Insiemi cun mê mari no mancjìn di fâsi viodi intai marcjâts ator pal Friûl.
◆ Par me i scarpets a son une robe bielissime. Si puedin meti ogni dì: in cjase al puest des çavatis, fûr di cjase tant che une scarpe comude e, parcè di no, in vieste plui fine e elegante pes fiestis. I vin fat ancje scarpets par nuviçs e po scarpets origjinâi neris cul ricam fat a man. Tal laboratori o ai ancje la ricamadore, ma le dopri dome par fâ lis iniziâls dai nons o par fâ cierts stemis particolârs che cualchidun al domande, se di no i ricams des rosis, che mi àn insegnât a fâ mê mari e mê none, ju fâs ducj a man. Mê agne e faseve il mac des rosis ancje cu lis fueis. Une volte lis feminis, tal ricamâ, a jerin un grum precisis e a dedicavin plui timp. Jo o ai semplificât il dissen, dongje di altris piçulis atenzions, par stâ dentri tai coscj in maniere che il prodot al seti ae puartade de sachete di ducj, ancje se il nestri vuadagn al è ridot.
◆ L’ultin pâr di scarpets al è lât in Gjapon, par une zovine. Pôc prime un pâr al è lât in Australie par une frute a pene nassude.
Se o soi rivade fin achì, al è in graciis di mê mari che za di cuant che o jeri piçule mi à tacât cheste biele passion e inmò in dì di vuê mi jude a puartâ indevant cheste ativitât.”
Nol reste che visitâ il sît www.scarpetzcarnici.it e vadì che ognidun al pues cjatâ il scarpet just pal so pît! ❚