Di timp, su chest gjornâl, o puarti indenant une rubriche di intervistis che si clame Mestris. O domandi ai ospits, protagoniscj de culture furlane, cui che a sedin stâts i lôr “mestris”: figuris che, cul lôr esempli, ju àn sburtâts a svicinâsi ae lenghe e ae culture dal Friûl. Intai ultins timps, plui di un intervistât al à volût fâ oltri ai nons di personaçs che a àn prodot oparis o che a son deventâts famôs, chei di personis comunis, bogns cu la lôr vite cuotidiane di incjarnâ valôrs autentics: il lavôr, l’ûs dal furlan intes robis di ogni dì, la solidarietât, l’amôr pe proprie tiere, la disponibilitât a dâ une man cuant che al coventave.
◆ Il mês passât, cence dî nuie e masse svelt, nus à lassâts un di lôr: Paolo Galliussi. Abonât ae Patrie, ativist dal Moviment Friûl fin dai principis, al à cirût simpri une vie par che i furlans a vessin une lôr rapresentance politiche. No di leader in prime file, ma lavorant dal bas, par fâ cressi ideis e personis che al ritignive preziosis.
◆ Cungjò, Pauli. Tu, insiemi a tancj altris come te, tu sês stât – e tu restarâs – il sâl vêr dal Friûl. ❚
Mandi, Pauli Galliussi
Dree Venier
