Un numar al è magjic pal Wörthersee: 14. Par vie che a son 14 i centesims che il spessôr de glace al à di vê par che il magheç al deventi pussibil. Ma chest pai carinzians, di 19 agns in ca, al è aromai nome un sium, stant che ai 12 di Fevrâr dal 2006 al è stât scancelât il benstâ ae piste par sgliciâ, che e puartave vie pal Invier ancje 20 mil personis di Clanfurt fintremai a Vilac. Di in chê volte, il lâc al è lontan di chel magjic 14, tant che la Lune.
◆ Il “mestri de glace” dal lâc (cussì lu clamavin) al ricuarde i moments di gracie di chel lontan 1967, cuant che il spessôr de glace al jere rivât a 50 cm e il lâc al coventave ancje tant che piste par 90 avions, e cun di plui pes corsis di cjavai, cjars e altri. Si vise ancje di cuant che si rivave a situazions spropositadis, tal moment che la cjalcje e jere tant grande che la int no voleve stâ in file sui imbarcjadôrs, ma e voleve saltâ lis paradanis cui glacins intai pîts e e colave dispès inte aghe glaçade. Magari cussì no, no si podaran plui viodi situazions di chest gjenar, par vie dai mudaments dal clime.
◆ Stant ai meteorolics, cun di fat, la probabilitât di tornâ a vê une largjure glaçade stabile e indurante sul Wörthersee e je cetant piçule, dibot une chimere, stant che il suriscjaldament al va simpri plui indevant. Intal Zenâr dal 2025 i grâts di medie a jerin tor il zero, ven a stâi 2,5 grâts sore de medie dai ultins 30 agns. A coventaressin gnots cetant fredis e claris in Dicembar e in Zenâr, che daspò il soreli al sarès masse alt e al mandarès fûr masse energjie. Ma in dì di vuê no esistin nancje plui i mês di Dicembar e Zenâr di une volte!
◆ Lis pussibilitâts par un disfredament dal lâc a van in piês di an in an ancje par un altri motîf: lis aghis a passin lis temperaduris altis dal Istât inte Sierade e de Sierade al Invier. La cognossince antighe, che e dîs che ae fin di Dicembar si varessin di vê sul lâc grandis neveadis par podê madressi il magheç de glace, e je aromai dineade dai fats, par vie che la cuantitât di nêf che e ven jù no je plui decisive.
◆ Aromai il lâc si disfrede une vore a planc, in medie un o doi decims di grât par gnot. Cun temperaduris di -10 /-20 grâts si puedin pierdi invezit di un a doi grâts. Il lâc al scomence a glaçâsi cuant che la temperadure e rive a doi grâts. Ai prins di Març di chest an la temperadure e jere di 5 grâts, Intal 1949 il lâc si inglaçà al prin di Zenâr, cence che al fos vignût jù nancje un floc di nêf, e ai 25 di Dicembar dal 1962 e fo la date plui anticipade pal sgliciament. A Nadâl il lâc al jere simpri in grant sbulieç e il spessôr de glace al rivave ancje a 80-90 centesims e al tignive fin a mieç di Avrîl, 4 mês sù par jù.
◆ Chescj timps a fasin aromai part de storie. Di in chê volte il lâc si è scjaldât di cuasi 3 grâts. L’Istât passade la temperadure e je rivade a 29,5°, cuintri di temperaduris passadis di massim 24°, tor metât Jugn. A son Inviers che si disvilupe une lastre cetant fine in cualchi jentrance, ma al mancje il grant frêt di une volte e si che duncje al è dificil che si torni a vê un strât di glace penze e indurante. ❚
Mai plui la maravee de glace sul Wörthersee!
Barbara Cinausero