Une triple publicazion par cure
dal Centri Studis Pari David Maria Turoldo
Une publicazion une vore impuartante e interessante e je la gnove stampe integrâl des lirichis, tra cjants a vilote e composizions di autôr di stamp cult e popolâr, dal compositôr Rodolfo Kubik. Un grant lavôr che al jes tai cincuante agns de sô muart, realizât di bande dal “Centro Studi Padre David Maria Turoldo”, par cure di Domenico Clapasson, president di Aldebaran Editions che e cure la publicazion, e di Daniele Parussini, organist e diretôr musicâl dal centri di studis turoldians di Coder di Sedean. E à titul “Voci e suoni oltre confine. Villotte e canti del Friuli Venezia Giulia”, une racuelte in trê volums che e va incuintri ai desideris dal stes compositôr, meti insiemi dutis lis sôs musichis su tescj di diviers poetis, trentetrê pe precision. Al meretarès nomenâju ducj, ma mi limiti a nomenâ dome cualchidun, chei plui cognossûts: Pier Paolo Pasolini, Biagio Marin, Arturo Zardini, chi cu la vieste di poete liric, Ugo Pellis, Eddi Bortolussi, Ercole Carletti, Lelo Cjanton, Enrico Fruch, Pieri Çorut. Ma a ’nd è altris, di Andreis, Dartigne, Dael, Cormons, Gurize, Grau, Vençon… Sul sît rodolfokubik.eu, che al conte ben di chest progjet, si puedin lei ducj i lôr nons e si pues ancje, midiant dai contats, cjoli i libris che us contìn.
I trê volums a racuein lis composizions par vôs e pianoforte, par côr masculin e par côr misturât.
◆ Come che a scrivin i curadôrs: «Une vision che e à cjapât vite tal desideri e te dibisugne di une ricercje aprofondide su lis vilotis e i cjants dal Friûl-Vignesie Julie componûts e elaborâts di Kubik. Une produzion largje che e evidenzie il so jessi tacât ae int e ae culture furlane, ma inmò di plui a chel ocean di relazions amicâls e spirituâls cui poetis de sô stesse tiere e stesse ete, autôrs di chei tescj che a deventaran une risultive inesauribile di ispirazion».
◆ Clapasson e Parussini a van ancje a specificâ la vene de poetiche musicâl di Kubik, e come che a scrivin: «La vilote di Rodolko Kubik e je simpri caraterizade di une atenzion profonde tal cjapâ sù la aderence fine tra peraule e linie musicâl. Un mût di fâ che a podaressin cuasi definî madrigalistic, intindût come rapuart une vore strent e sinergjic tra musiche e poesie. Kubik al è atent in particolâr ae singule peraule e ae ricercje di imagjins poetichis e musicâls che a puedin esprimi il concet dal test. Inte sô opare si guste un gust armonic fin, mai scontât, cetant ancorât al lengaç musicâl talian, e cun di plui furlan in maniere salde».
A son in totâl 124 composizions, indulà che l’autentic spirt furlan al è fuart, si lu sint strent e gjenuin, ben inmaneât cu la sô scriture savie e culte che e je buine di conservâ il savôr origjinari dal cjant in Friûl.
◆ Une disamine che e vâl la pene di valutâ ancje in cont de vite di Kubik, che al à vût di lassâ il Friûl pe Argjentine, par vie des persecuzions fassistis. Nol jere furlan di nassite, al jere nassût a Pole ma la mari e jere di Roncjis di Monfalcon, e alì si è trasferît cu la famee tal 1903, cuant che al veve a pene doi agns.
◆ Apassionât za di frut ae musiche, il pari al direzeve la bande citadine e di lui al imparà a sunâ l’oboe, il clarin, il flaut, studiant pianoforte cun Rodolfo Pellis. Al studie ancje cun Arturo Cesare Seghizzi e finide la prime vuere mondiâl si note al Conservatori Tartini di Triest, studiant cun Antonio Illesberg che lu laude cetant: «In Kubik o ai cjatât, oltri a une facoltât creative straordenarie come compositôr, une predisposizion specialissime e naturâl come istrutôr e animadôr di grups corâi». Al vinç diviers concors e dopo al va a Viene par perfezionâsi. Al cognòs personaçs di rilêf, come Arnold Schönberg, il pari de dodecafonie, e al devente membri de Societât austriache di musicologjie. Al torne dispès in Friûl ma cu la rivade dal fassisim al sucêt il patatrac. Intant di une manifestazion, lis cjamesis neris ai disin di tacâ il conciert cun “Giovinezza”, ma lui si refude, e par chest al ven pestât. Al cjape alore la decision e al rive a scjampâ in Argjentine, indulà che al è a stâ so fradi. Stabilît a Buenos Aires, al cjate di sunâ il pianoforte intai cines pai films mûts e planc plancut la sô cariere e cjape pît. Si ten in contat strent cu la comunitât furlane di emigrants, al dirêç côrs, ancje par tantis radios, come Radio Argentina, Radio Cultura, Radio Nacional, Radio Belgrado e Radio El Mundo, e al devente diretôr de Associazion argjentine di musiche di cjamare. Al valorize la produzion musicâl argjentine e, clâr, ancje chê furlane, con sôs composizions e di altris autôrs, tant che Tomadini, Zardini, Garzoni, Escher, che al puarte intai programs di concierts par dute la citât. Al ven fintremai nomenât diretôr dal côr polifonic de Radio di Stât argjentine, al fonde la “Agrupaciòn coral Buenos Aires” e tal 1961 al devente membri dal Istitût interamerican di musicologjie, oltri a direzi i côrs de Universidad Nacional de Cuyo. Tal 1970 al ricêf la “Gallusova Plaketa”, massime onorificence slovene in cjamp musicâl, e il Friûl i tribute il premi “Epifanie”, pe sô produzion musicâl e par vê pandût la musiche furlane tal forest.
◆ Si pues alore ben capî cemût che la triple publicazion a pene jessude par cure dal “Centro Studi Padre David Maria Turoldo”, e sedi une vore impuartante e parcè che i curadôrs a àn intenzion di stampâ dute la produzion dal mestri Kubik. Un grant e biel lavôr. ❚